የአል-ሸባብ አዛዦች በአፍሪቃ ህብረትና በሶማልያ ብሄራዊ ሰራዊት እንደተገደሉ የህብረቱ መግለጫ አስታወቀ

ስድስት ተጨማሪ የአል-ሸባብ ወታደራዊ አዛዦች ካለፉት ጥቂት ቀናት ወዲህ በአፍሪቃ ህብረት ሰላም ጠባቂ ሀይሎችና በሶማልያ ብሄራዊ ሰራዊት እንደተገደሉ የአፍሪቃ ህብረት ተልእኮ ባወጣው መግለጫ አስታውቋል።

የአከባቢው የአል-ሸባብ የስለላ ክፍል ሀላፊ ሐሰን ዐሊ ድሁሬ እንደተገደለ ሮይተርስ የዜና አገልግሎት ዘግቧል። የአማጽያኑ ቃል አቀባይ ድሁሪም እንደተገደለ ገልጿል። ስለሌሎቹ ግን ማረጋጋጫ አልሰጠም።

የተባበሩት ሃይሎች በአሸባሪው ቡድን ላይ የሚያካሄዱትን ውጊያ ባጠናከሩበት በአሁኑ ወቅት በአንድ ሳምንት ጊዜ ውስጥ የተገደሉት የጽንፈኛው ቡድን ወታደራዊ አዛዦች ሰባት ደርሰዋል ማለት ነው።

ባለፈው ቅዳሜ በተባበረው ሃይል ጃንዐሌ ላይ የተገደለው የአል-ሸባብ ወታደራዊ አዛዥ አብዲራሽር ቡግዱቤ የተባለው ነው። ሌሎቹ ደግሞ የሊጎ የአል-ሸባብ አዛዥ ሼኽ መሐመድ ዓሊ፣ በጃንዐሌ የአል-ሸባብ ዳኛ የነበረው መሐመድ አብሪባኦና ዋናው አሰልጣኝ ሼኽ ማንሱር እንደሚገኙባቸው የአሚሶም መገጫ ጠቅሷል።