በኦሮሚያ ክልል የምሥራቅ ቦረና ዞን በዐዲስ መልክ መዋቀሩን ተከትሎ የተፈጠረው ውዝግብ፣ ኹሉንም ባሳተፈ የምክክር መድረክ በሰከነ አካሔድ እንዲፈታ፣ የቦረና እና የጉጂ አባ ገዳዎች ጠየቁ።
የጉጂ አባ ገዳ ጅሎ መንዶ፣ የአስተዳደር መዋቅር መዘርጋት የመንግሥት ሥራ እንደኾነ ገልጸው፣ ለግጭት መንሥኤ እንዳይኾን፣ አቤቱታ አቅርበው እንደነበረ ተናግረዋል። የቦረና አባ ገዳ ኩራ ጃርሶ በበኩላቸው፣ የምሥራቅ ቦረና ዞን መዋቀር፣ ሲነሣ ለቆየው ጥያቄ ምላሽ የሰጠ ቢኾንም፣ ውሳኔውን ተከትሎ የተከሠቱ አለመግባባቶች በምክክር መፈታት እንዳለባቸው አሳስበዋል።
ዝርዝር ዘገባውን ከተያያዘው ፋይል ይከታተሉ፡፡
በዐማራ ክልል በሰሜን ጎንደር ዞን በጃን አሞራ ወረዳ፣ ዘንድሮ በተከሠተው ድርቅ ምክንያት፣ ከ12ሺሕ በላይ ተማሪዎች ትምህርታቸውን እንዳቋረጡ ተገለጸ፡፡
የወረዳው አስተዳዳሪ ተወካይ እና የትምህርት ጽ/ቤት ሓላፊ አቶ ሀብታሙ ኀይሉ፣ ዛሬ ኀሙስ ከአሜሪካ ድምፅ ጋራ በነበራቸው ቆይታ፣ በወረዳው በ38 ቀበሌዎች ባሉ ትምህርት ቤቶች ይማሩ ከነበሩት ከ17ሺሕ በላይ ተማሪዎች ውስጥ፣ ዘንድሮ በትምህርት ገበታቸው የተገኙት፣ አምስት ሺሕ ያህሉ ብቻ እንደኾኑ አስታውቀዋል፡፡
ዋናው የችግሩ መንሥኤ፣ በአካባቢው የተከሠተው ድርቅ እና በዚኽም ሳቢያ፣ ወላጆች የትምህርት ቁሳቁስ ለልጆቻቸው ማሟላት አለመቻላቸው እንደኾነ፣ አቶ ሀብታሙ አስረድተዋል፡፡
ያነጋገርናቸው የተማሪዎች ወላጆች በበኩላቸው፣ ልጆቻቸውን በባዶ ሆዳቸው ረጅም መንገድ ተጉዘው ወደ ትምህርት ቤት እንዲሔዱ አለመፈለጋቸውን ተናግረዋል፡፡ በረኀብ ምክንያት ከትምህርት ገበታ የራቁ ተማሪዎችም፣ ለስደት እንደተዘጋጁ አመልክተዋል፡፡
የርዳታ እህል ወደ ወረዳው መላኩን ያስታወቀው የክልሉ የአደጋ መከላከል እና ምግብ ዋስትና ኮሚሽን በበኩሉ፣ ባለው የጸጥታ መደፍረስ የተነሣ ለችግረኞች ለማዳረስ እንዳልተቻለ ገልጿል፡፡
ዝርዝር ዘገባውን ከተያያዘው ፋይል ይከታተሉ፡፡
