ረሃብ በአፍሪካ

በዐማራ ክልል በዋግ ኽምራ ዞን በመኸር ዘመኑ የተከሠተውን ድርቅ ተከትሎ፣ በሰሀላ ሰየምት ወረዳ ከጸናው ረኀብ ጋራ በተያያዘ የሚሞተው ሰው ቁጥር እንደጨመረ፣ አንድ የአካባቢው ባለሥልጣን ተናገሩ፡፡

በወረዳው የብላዛ ቀበሌ አስተዳዳሪ አቶ ማለደ ብሬ፣ ባለፈው ወር ከረኀብ የተነሳ የአራት የቀበሌው ነዋሪዎች ሕይወት ማለፉን ተናግረዋል፡፡ ከዚያም ወዲህ የርዳታ እህል ባለመቅረቡ፣ ባለፈው ሳምንት ሁለት ተጨማሪ ሕፃናት እንደሞቱ ገልጸዋል፡፡

ስለ ጉዳዩ የተጠየቀው፣ የዐማራ ክልል የአደጋ መከላከል እና ምግብ ዋስትና ኮሚሽን፣ በዞኑ የረኀብ አደጋ ወደ አንዣበባባቸው አካባቢዎች የዕለት ርዳታ ተልኳል፤ ብለዋል፡፡

የዋግኽምራ ዞን የአደጋ መከላከል እና ምግብ ዋስትና ማስተባበሪያ ጽ/ቤት በበኩሉ፣ የርዳታ እህል መላኩን ጠቅሶ ነገር ግን ከተረጂው ቁጥር አንጻር አነስተኛ እንደኾነ አመልክቷል፡፡ ከገባሬ ሠናይ ድርጅቶች ተጨማሪ ርዳታ ለማሰባሰብም፣ የጸጥታው ችግር ዕንቅፋት እንደኾነበት አክሏል፡፡

ዝርዝሩን ከተያያዘው ፋይል ይከታተሉ።

በዐማራ ክልል በልዩ ልዩ ዞኖች በተከሠተው ድርቅ ለተጎዱና ከተለያዩ ዞኖች ለተፈናቀሉ ከሁለት ሚሊዮን በላይ ዜጎች፣ አስቸኳይ የዕለት እህል ርዳታ እንዲቀርብ ጥሪ ተላለፈ፡፡

የዐማራ ክልል አደጋ መከላከል እና ምግብ ዋስትና ፕሮግራም ማስተባበሪያ ኮሚሽን ኮሚሽነር ዲያቆን ተስፋሁን ባያብል፣ ዛሬ ረቡዕ ለአሜሪካ ድምፅ እንደተናገሩት፣ በክልሉ አብዛኛው ቆላማ አካባቢዎች ድርቅ ተከሥቷል፡፡

ከሁለት ሚሊዮን በላይ ሕዝብ፣ ጊዜ የማይሰጥ አስቸኳይ የዕለት ምግብ ርዳታ እንደሚያስፈልገው የገለጹት ኮሚሽነሩ፣ ከእኒኽም ውስጥ በግጭት ምክንያት፣ ከአገሪቱ ልዩ ልዩ አካባቢዎች ተፈናቅለው በካምፕ እና ከማኅበረሰቡ ጋራ ተቀላቅለው የሚኖሩ እንደሚገኙበት ጠቅሰዋል።

በክልሉ፣ በሰው ሠራሽ እና በተፈጥሮ አደጋ የተከሠተውን የምግብ እጥረት ለማቃለል፣ መንግሥት ጥቂት ጥረት ቢያደርግም፣ የጸጥታ ችግሩ የሰብአዊ ርዳታን ለማጓጓዝ ዕንቅፋት እንደፈጠረባቸው፣ ዲያቆን ተስፋሁን ተናግረዋል፡፡

ኮሚሽነሩ አያይዘውም፣ በውጭ እና በሀገር ውስጥ የሚገኙ ኢትዮጵያውያንና ለጋሽ ድርጅቶች፣ የርዳታ እጃቸውን እንዲዘረጉ ጥሪ አቅርበዋል፡፡

ዝርዝሩን ከተያያዘው ፋይል ይከታተሉ።