ረሃብ በአፍሪካ

በዐማራ ክልል በልዩ ልዩ ዞኖች በተከሠተው ድርቅ ለተጎዱና ከተለያዩ ዞኖች ለተፈናቀሉ ከሁለት ሚሊዮን በላይ ዜጎች፣ አስቸኳይ የዕለት እህል ርዳታ እንዲቀርብ ጥሪ ተላለፈ፡፡

የዐማራ ክልል አደጋ መከላከል እና ምግብ ዋስትና ፕሮግራም ማስተባበሪያ ኮሚሽን ኮሚሽነር ዲያቆን ተስፋሁን ባያብል፣ ዛሬ ረቡዕ ለአሜሪካ ድምፅ እንደተናገሩት፣ በክልሉ አብዛኛው ቆላማ አካባቢዎች ድርቅ ተከሥቷል፡፡

ከሁለት ሚሊዮን በላይ ሕዝብ፣ ጊዜ የማይሰጥ አስቸኳይ የዕለት ምግብ ርዳታ እንደሚያስፈልገው የገለጹት ኮሚሽነሩ፣ ከእኒኽም ውስጥ በግጭት ምክንያት፣ ከአገሪቱ ልዩ ልዩ አካባቢዎች ተፈናቅለው በካምፕ እና ከማኅበረሰቡ ጋራ ተቀላቅለው የሚኖሩ እንደሚገኙበት ጠቅሰዋል።

በክልሉ፣ በሰው ሠራሽ እና በተፈጥሮ አደጋ የተከሠተውን የምግብ እጥረት ለማቃለል፣ መንግሥት ጥቂት ጥረት ቢያደርግም፣ የጸጥታ ችግሩ የሰብአዊ ርዳታን ለማጓጓዝ ዕንቅፋት እንደፈጠረባቸው፣ ዲያቆን ተስፋሁን ተናግረዋል፡፡

ኮሚሽነሩ አያይዘውም፣ በውጭ እና በሀገር ውስጥ የሚገኙ ኢትዮጵያውያንና ለጋሽ ድርጅቶች፣ የርዳታ እጃቸውን እንዲዘረጉ ጥሪ አቅርበዋል፡፡

ዝርዝሩን ከተያያዘው ፋይል ይከታተሉ።

በዐማራ ክልል በዋግ ኽምራ ዞን ሦስት ወረዳዎች በተከሠተው ድርቅ ሰዎች እየሞቱ እንደኾነ፣ የአካባቢው ባለሥልጣናት ተናገሩ፡፡

በዞኑ፣ ካለፈው ዓመት አንሥቶ በተከሠተው ድርቅ ምክንያት፣ በተለይ በሰሀላ ሰየምት ወረዳ ባለፈው አንድ ወር ብቻ አራት ሰዎች እና በሺሕዎች የሚቆጠሩ የቤት እንስሳት እንደሞቱ፣ ባለሥልጣናቱ ዛሬ ሰኞ ለአሜሪካ ድምፅ አረጋግጠዋል፡፡

አካባቢው ዝናም አጠር በመኾኑ፣ ሕዝቡ የርዳታ እህል እየተሰፈረለት ይኖር እንደነበር፣ የሰሀላ ሰየምት ወረዳ አስተዳዳሪ አቶ ሲሳይ ብሩ ተናግረዋል። ለአካባቢው የርዳታ እህል ሲያከፋፍሉ የነበሩ ለጋሽ ድርጅቶች፣ ድጋፍ ማቆማቸውና ዘንድሮም ዝናም አለመዝነሙ ችግሩን እንዳባባሰው፣ አቶ ሲሳይ ብሩ ገልጸዋል፡፡

አስቸኳይ የምግብ ርዳታ ወደ በቅርቡ ወረዳው ካልተላከ፣ ከ42ሺሕ በላይ ሕዝብ ለአደጋ እንደሚጋለጥ፣ የወረዳው ሓላፊው ጠቁመዋል፡፡

የዞኑ የመንግሥት ኮሙኒኬሽን መምሪያ ሓላፊ አቶ ከፍያለው ደባሽ በበኩላቸው፣ በአበርገሌ፣ ጻግብጂ እና ሰሀላ ሰየምት ወረዳዎች፣ ከፍተኛ ድርቅ እንደተከሠተ አረጋግጠው፣ በተለይ በሰሀላ ሰየምት ወረዳ፣ ርዳታ በቅርቡ በአውሮፕላን ካልደረሰ፣ በሳምንታት ጊዜ ውስጥ ብዙ ሰዎች ሊሞቱ እንደሚችሉ፣ ስጋታቸውን ገልጸዋል፡፡

የዐማራ ክልል የአደጋ መከላከል እና ምግብ ዋስትና ኮሚሽን ቅድመ ማስጠንቀቂያና ምላሽ ኮሚሽን ዲሬክተር አቶ ብርሃኑ ዘውዱ፣ በአካባቢው፣ በመንግሥት የጸጥታ ኀይሎች እና በፋኖ ታጣቂ ቡድን መካከል የተስፋፋው ግጭት፣ ወደ አካባቢው የርዳታ እህል ለማጏጏዝ ዕንቅፋት እንደኾነ አመልክተዋል፡፡

ዝርዝሩን ከተያያዘው ፋይል ይከታተሉ።