ረሃብ በአፍሪካ

በዐማራ ክልል በሰሜን ጎንደር ዞን በጃን አሞራ ወረዳ፣ ዘንድሮ በተከሠተው ድርቅ ምክንያት፣ ከ12ሺሕ በላይ ተማሪዎች ትምህርታቸውን እንዳቋረጡ ተገለጸ፡፡

የወረዳው አስተዳዳሪ ተወካይ እና የትምህርት ጽ/ቤት ሓላፊ አቶ ሀብታሙ ኀይሉ፣ ዛሬ ኀሙስ ከአሜሪካ ድምፅ ጋራ በነበራቸው ቆይታ፣ በወረዳው በ38 ቀበሌዎች ባሉ ትምህርት ቤቶች ይማሩ ከነበሩት ከ17ሺሕ በላይ ተማሪዎች ውስጥ፣ ዘንድሮ በትምህርት ገበታቸው የተገኙት፣ አምስት ሺሕ ያህሉ ብቻ እንደኾኑ አስታውቀዋል፡፡

ዋናው የችግሩ መንሥኤ፣ በአካባቢው የተከሠተው ድርቅ እና በዚኽም ሳቢያ፣ ወላጆች የትምህርት ቁሳቁስ ለልጆቻቸው ማሟላት አለመቻላቸው እንደኾነ፣ አቶ ሀብታሙ አስረድተዋል፡፡

ያነጋገርናቸው የተማሪዎች ወላጆች በበኩላቸው፣ ልጆቻቸውን በባዶ ሆዳቸው ረጅም መንገድ ተጉዘው ወደ ትምህርት ቤት እንዲሔዱ አለመፈለጋቸውን ተናግረዋል፡፡ በረኀብ ምክንያት ከትምህርት ገበታ የራቁ ተማሪዎችም፣ ለስደት እንደተዘጋጁ አመልክተዋል፡፡

የርዳታ እህል ወደ ወረዳው መላኩን ያስታወቀው የክልሉ የአደጋ መከላከል እና ምግብ ዋስትና ኮሚሽን በበኩሉ፣ ባለው የጸጥታ መደፍረስ የተነሣ ለችግረኞች ለማዳረስ እንዳልተቻለ ገልጿል፡፡

ዝርዝር ዘገባውን ከተያያዘው ፋይል ይከታተሉ፡፡

በዐማራ ክልል በዋግ ኽምራ ዞን በሰሀላ ሰየምት ወረዳ፣ በ2015/16 የመኸር ምርት ዘመን የተከሠተው የዝናም እጥረት ባስከተለው ከባድ ድርቅ፣ ከአራት ሺሕ በላይ የቤት እንስሳት እንደሞቱና በሚሊዮን የሚቆጠሩትም ወደ አጎራባች አካባቢዎች እየተሰደዱ እንደኾኑ ተገለጸ፡፡

የዞኑ አደጋ መከላከል እና ምግብ ዋስትና ማስተባበሪያ ጽ/ቤት ሓላፊ አቶ ምሕረት መላኩ፣ ዛሬ ረቡዕ ለአሜሪካ ድምፅ እንደተናገሩት፣ ከ22 ግብረ ሠናይ ድርጅቶች እና ከመንግሥታዊ ተቋማት ተወጣጥቶ የተቋቋመው የጥናት ቡድን ወደ ወረዳው አምርቶ፣ ድርቁ ያስከተለው ችግር ከፍተኛ እንደኾነ አረጋግጧል፡፡

ያነጋገርናቸው የሰሀላ ሰየምት ወረዳ ምሽሀ ቀበሌ አርሶ አደሮችም፣ የቤት እንስሶቻቸው በመሞታቸው ለፈታኝ ሕይወት እንደተዳረጉ አመልክተዋል፡፡

ዝርዝር ዘገባውን ከተያያዘው ፋይል ይከታተሉ፡፡