ረሃብ በአፍሪካ

በዐማራ ክልል ሰሜን ጎንደር ዞን ሦስት ወረዳዎች፣ የዓለም የምግብ ፕሮግራም እና የዩናይትድ ስቴትስ ዓለም አቀፍ ተራድኦ ድርጅት/USIDA/፣ ካለፈው ዓመት ሰኔ ወር ጀምሮ ርዳታ በማቋረጣቸው፣ በዞኑ 32 ሰዎች በረኀብ እንደሞቱ፣ የአካባቢው ባለሥልጣናት ገለጹ፡፡

የዞኑ የመንግሥት ኮሙኒኬሽን መምሪያ ሓላፊ አቶ ይርዳው ሲሳይ፣ ለአሜሪካ ድምፅ እንደተናገሩት፣ የርዳታው መቆምና በአካባቢው የተከሠተው ድርቅ ባስከተለው ረኀብ ከሞቱት ሰዎች በተጨማሪ፣ ወደ 200ሺሕ የሚደርስ ሕዝብ፣ አስቸኳይ የምግብ ርዳታ እንደሚያሻው ጠቁመዋል፡፡

አካባቢው ወትሮም ለድርቅ ተጋላጭ እንደኾነና ከ800ሺሕ ሕዝብ በላይ በርዳታ እንደሚኖር ያወሱት አቶ ይርዳው፣ ዓለም አቀፍ ለጋሾቹ ያቋረጡትን ሰብአዊ ርዳታ ዳግም እንዲጀምሩ አመልክተዋል፡፡ ረኀብ እንደጸናባቸው የተናገሩ፣ በዞኑ የጃንአሞራ ወረዳ የክልል ማርያም ቀበሌ ነዋሪዎችም፣ ሰብአዊነት የሚሰማው ዜጋ የርዳታ እጁን እንዲዘረጋላቸው ተማፅነዋል፡፡

ዝርዝሩን ከተያያዘው ፋይል ይከታተሉ።

ኤል ኒኞ የተባለው የአየር ንብረት ዑደታዊ ለውጥ፣ “በመጪው ሦስት ወራት ውስጥ፣ ምሥራቅ አፍሪቃን ይመታል፤” ሲሉ፣ የግብረ ሠናይ ድርጅቶች እና የሶማሊያ መንግሥት ባለሥልጣናት አስጠነቀቁ።

“ከመጠን ያለፈ ዝናም፥ በሶማሊያ፣ በኢትዮጵያ ሶማሌ ክልል እና በኬንያ፣ እንዲሁም በሌሎች የምሥራቅ አፍሪካ አካባቢዎች፣ የጎርፍ አደጋ ሊያስከትል ይችላል፤” ሲሉ፣ በተባበሩት መንግሥታት ድርጅት የምግብ እና እርሻ ፕሮግራም ባለሥልጣናት አስጠንቅቀዋል።

የኤል ኒኞ የአየር ንብረት ዑደታዊ ለውጥ እና ከጥቅምት እስከ ታኅሣሥ ከሚቆየው የአካባቢው የዝናም ወራት ጋራ በመገጣጠሙ፣ በሶማሊያ ብቻ ቁጥሩ 1ነጥብ2 ሚሊዮን የሚደርስ ሕዝብ ሊጎዳ እንደሚችል ግምት አሳድሯል።

ከሁለቱ ታላላቅ ወንዞች ጁባ እና ሸበሌ አቅራቢያ የሚኖሩ የማኅበረሰብ አባላትም፣ የጥንቃቄ ርምጃዎችን እንዲወስዱና በከፍታ ቦታዎች እንዲቆዩ ማስጠንቀቂያ ተሰጥቷቸዋል። ሰዎች የኤል ኒኞን መምጣት “በቁም ነገር ሊያጤኑትና ተገቢ ርምጃ ለመውሰድም እንቅስቃሴ መጀመር አለባቸው፤” ሲሉ፣ የድርጅቱ የምሥራቅ አፍሪካ ቢሮ ባልደረባ ፓኦሎ ፓሮን አሳስበዋል።