ናይሮቢ —
የስድስት ወር ህጻን ዴለሪን ሳሲ ዋሲኬ አባት ለጋዜጠኞች መግለጫ እየሰጠ
የናይሮቢ ኬንያ የመድህን ሰራተኞች ለአንድ ሳምንት ከሚጠጋ ጊዜ በፊት ከተደረመሰው የአፓርትማ ህንጻ ፍርስራሽ ውስጥ የ6 ወር ህጻን ልጅ ማክሰኞ ሲያድኑ ዛሬ ደግሞ አንዲት ሴት በህይወት አገኙ። ህንጻው ሲደረመስ ቢያንስ 26 ሰዎች ሞተዋል።
ፓየስ ማሳይ የተባሉ የመድህን ስራው ሃላፊ ዛሬ ለጋዜጣኞች በተናገሩት መሰረት የተገኘችው ሴት አሁንም ገና ከተቀረቀረችበት ፍርስራሽ ለመውጣት አልቻለችም። ይሁንና ሰራተኞቹ ካስወጥዋት በኋላ ሊያክምዋት ከሚጠባበቁት የህክምና ሰራተኞች ጋር ለመነጋገር ችላለች።
“ለመንቀሳቀስ አትችልም። ግን ደህነ ናት” ሲሉ ሃላፊው ለሮይተርስ ዜና አገልግሎት ተናግረዋል። ባለፈው ማክሰኞም የኬንያ የቀይ መቀል ድርጅት አንድ ህጻን ልጅን ከተቀረቀረችበት ለማውጣት ችሏል። ህጻኗ ከሶስት ቀናት በኋላ ነው በፍርስራሹ ስር የተገኘችው።
135 የሚሆኑ ሰዎችን ከአደጋው ለማትረፍ ተችሏል። በርካታ ሌሎች ሰዎች ገና የገቡበት አልታወቀም። ባለስልታኖች ከአሁን ወዲህ በፍርስራሹ ውስጥ በህወት ያለ ሰው እናገኛለን የሚል እምነት እንደሌላቸው አስገንዝበዋል።
