ረሃብ በአፍሪካ

በዐማራ ክልል ሰሜን ጎንደር ዞን በሦስት ወረዳዎች፣ በ2015/16 መኸር ምርት የተከሠተው ድርቅ ባስከተለው ረኀብ፣ አራት ተጨማሪ ሰዎች እንደሞቱ፣ የደባርቅ ዩኒቨርሲቲ አስታወቀ፡፡

በዞኑ በጃን አሞራ፣ በየዳ እና ጠለምት ወረዳዎች፣ ድርቁ ባስከተለው ጉዳት፣ ከወር በፊት 32 ሰዎች እንደሞቱ፣ በአካባቢው ባለሥልጣናት ተገልጾ እንደነበር ዩኒቨርሲቲው አስታውሷል፡፡ ተቋሙ በራሱ፣ ከአንድ ወር በላይ አደረግኹት ባለው ጥናት ደግሞ፣ ሕይወታቸው ያለፉት ወገኖች ቁጥር ወደ 36 ከፍ እንዳለና ከ72ሺሕ በላይ እንስሳትም እንደሞቱ፣ መምህር እና የጥናት ቡድኑ ሰብሳቢ ረዳት ፕሮፌሰር አምሳሉ አበጀ፣ ዛሬ ለአሜሪካ ድምፅ ገልጸዋል፡፡

በሦስቱ ወረዳዎች ውስጥ በሚገኙ 37 ቀበሌዎች፣ ከ107ሺሕ በላይ ሰዎች፣ አስቸኳይ የዕለት ምግብ ርዳታ እንደሚያስፈልጋቸው፣ በጥናቱ ተጠቁሟል፡፡ እስከ አኹን የደረሰው ርዳታ በቂ እንዳልኾነ የተናገሩት የጥናት ቡድኑ ሰብሳቢ፣ በመኸሩ ምንም ዐይነት ምርት ባለመገኘቱና እንስሳቱም በመሞታቸው፣ ነዋሪዎቹ ከዓመት እስከ ዓመት ርዳታ እንደሚያሻቸው አመልክተዋል፡፡

ዝርዝሩን ከተያያዘው ፋይል ይከታተሉ።

በዐማራ ክልል በዋግ ኽምራ ዞን ሰሃላ ሰየምት ወረዳ ቢላዛ ቀበሌ፣ ባለፉት አራት ቀናት ውስጥ፣ በረኀብ የተጎዱ ተጨማሪ ሰዎች እንደሞቱ፣ የአካባቢው ባለሥልጣን አስታወቁ፡፡

የቀበሌው አስተዳዳሪ አቶ ማለደ ብሬ ለአሜሪካ ድምፅ እንደተናገሩት፣ በ2015/16 የመኸር ዘመን በአካባቢው የተከሠተው ድርቅ ባስከተለው ረኀብ፣ ቀደም ሲል ስድስት ሰዎች እንደሞቱ አውስተው፣ ባለፉት አራት ቀናት ውስጥ፣ ይህ ቁጥር ወደ ስምንት ከፍ እንዳለ ገልጸዋል፡፡

በቀበሌው ረኀቡ እየከፋ ከመምጣቱ የተነሣ፣ ከዚኽ ቀደም የርዳታ እህል የሚጓጓዝባቸው አህዮችም ሳይቀሩ፣ በመኖ እጥረት ዐቅማቸው እንደደከመና ርዳታው ቢገኝ እንኳን ወደ ቀበሌው ማድረሱ ሌላው ፈተና እንደኾነ፣ አቶ ማለደ አክለው አመልክተዋል፡፡

በክልሉ የኢትዮጵያ ቀይ መስቀል ማኅበር ቅርንጫፍ ጽ/ቤት ሓላፊ አቶ የሻምበል ዋለም፣ ሰሞኑን ወደ ሰሃላ ሰየምት ወረዳ ሊላክ የነበረውና ባሕር ዳር ከተማ ላይ እንደቆመ የዘገየው የርዳታ እህል፣ በመንገድ እና በጸጥታ ችግሮች ምክንያት ወደ ሰሜን ጎንደር ዞን እንደተላከ አስታውቀዋል፡፡

የክልሉ የአደጋ መከላከል እና ምግብ ዋስትና ኮሚሽንም፣ 40 በመቶ የርዳታ እህል በጸጥታ ችግር ምክንያት ለማሰራጨት እንዳልተቻለ፣ ባለፈው ሳምንት ለአሜሪካ ድምፅ መግለጹ ይታወሳል፡፡

ዝርዝሩን ከተያያዘው ፋይል ይከታተሉ።