ረሃብ በአፍሪካ

በዐማራ ክልል ዋግ ኽምራ ዞን የተከሠተው ድርቅ ባስከተለባቸው ጉዳት ምክንያት የሞቱት የቤት እንስሳት ብዛት ከዐሥር ሺሕ በላይ እንደደረሰ፣ የዞኑ የአደጋ መከላከል እና ምግብ ዋስትና ማስተባበርያ ጽ/ቤት ገለጸ፡፡

የጽ/ቤቱ ሓላፊ አቶ ምሕረት መላኩ፣ ዛሬ ዐርብ ለአሜሪካ ድምፅ እንደተናገሩት፣ ባለፈው ወር ብቻ፣ ከረኀቡ ጉዳት የተነሣ ከስድስት ሺሕ በላይ የቤት እንስሳት እንደሞቱ አስታውሰዋል፡፡ ቁጥሩ ሊጨምር የቻለው፣ ከሰብአዊ ርዳታው ጎን ለጎን የእንስሳት መኖ ርዳታንም በማሰባሰብ ላይ ትኩረት ተሰጥቶ ባለመሠራቱ ነው፤ ብለዋል፡፡

መንግሥት እና መንግሥታዊ ያልኾኑ ድርጅቶች፣ ርዳታውን በማሰባሰብ ላይ በትኩረት ካልሠሩ፣ የእንስሳት ጉዳት ሊባባስና ነዋሪውም ከአካባቢው ሊፈናቀል እንደሚችል፣ ሓላፊው አሳስበዋል፡፡

ሁለት የእርሻ በሬዎችን ጨምሮ ስምንት የቤት እንስሶቻቸው እንደሞቱባቸው የነገሩን፣ በሳሃላ ሰየምት ወረዳ መንደር 04 ነዋሪ አርሶ አደር ደሴ ገብሩ፣ በአካባቢው ለመኖርም ተቸግረው ለመሸሸም ዐቅም አጥተው ከረኀብ ጋራ ተፋጠው እንደሚገኙ፣ ለአሜሪካ ድምፅ ተናግረዋል፡፡

ዝርዝሩን ከተያያዘው ፋይል ይከታተሉ፡፡

በትግራይ ምሥራቃዊ ዞን ኣፅቢ ወረዳ፣ ባለፉት ሦስት ወራት፣ 111 ሰዎች በረኀብ እንደሞቱ፣ የወረዳው አስተዳደር አስታወቀ፡፡

የወረዳው የኢኮኖሚ ዘርፍ ሓላፊ አቶ ብርሃነ ገብረ፣ ባለፈው ክረምት፣ በወረዳው በቂ ዝናም ባለመዝነሙ ድርቅ እንደተከሠተ ጠቅሰው፣ በዚኽም፣ ከ82 ሺሕ በላይ ሕዝብ ለረኀብ እንደተጋለጠ ገልጸዋል፡፡

አኹን በወረዳው የተገኘው ምርት፣ ሕዝቡን ለመቀለብ የሚችለው ለ11 ቀናት ብቻ ነው፤ ያሉት ሓላፊው፣ የረኀብ አደጋው ለብዙዎች ሕይወት አስጊ እንደኾነ አመልክተዋል፡፡

የወረዳዋ ነዋሪዎችም፣ “ሞታችንን በዳጃችን ኾነን እየጠበቅን ነን፤” ሲሉ ረጂ አካላት አስቸኳይ ድጋፍ እንዲያደርሷቸው ተማፅነዋል፡፡

ዝርዝሩን ከተያያዘው ፋይል ይከታተሉ።