ረሃብ በአፍሪካ

በዐማራ ክልል በዋግ ኽምራ ዞን ሰሃላ ሰየምት ወረዳ ቢላዛ ቀበሌ፣ ባለፉት አራት ቀናት ውስጥ፣ በረኀብ የተጎዱ ተጨማሪ ሰዎች እንደሞቱ፣ የአካባቢው ባለሥልጣን አስታወቁ፡፡

የቀበሌው አስተዳዳሪ አቶ ማለደ ብሬ ለአሜሪካ ድምፅ እንደተናገሩት፣ በ2015/16 የመኸር ዘመን በአካባቢው የተከሠተው ድርቅ ባስከተለው ረኀብ፣ ቀደም ሲል ስድስት ሰዎች እንደሞቱ አውስተው፣ ባለፉት አራት ቀናት ውስጥ፣ ይህ ቁጥር ወደ ስምንት ከፍ እንዳለ ገልጸዋል፡፡

በቀበሌው ረኀቡ እየከፋ ከመምጣቱ የተነሣ፣ ከዚኽ ቀደም የርዳታ እህል የሚጓጓዝባቸው አህዮችም ሳይቀሩ፣ በመኖ እጥረት ዐቅማቸው እንደደከመና ርዳታው ቢገኝ እንኳን ወደ ቀበሌው ማድረሱ ሌላው ፈተና እንደኾነ፣ አቶ ማለደ አክለው አመልክተዋል፡፡

በክልሉ የኢትዮጵያ ቀይ መስቀል ማኅበር ቅርንጫፍ ጽ/ቤት ሓላፊ አቶ የሻምበል ዋለም፣ ሰሞኑን ወደ ሰሃላ ሰየምት ወረዳ ሊላክ የነበረውና ባሕር ዳር ከተማ ላይ እንደቆመ የዘገየው የርዳታ እህል፣ በመንገድ እና በጸጥታ ችግሮች ምክንያት ወደ ሰሜን ጎንደር ዞን እንደተላከ አስታውቀዋል፡፡

የክልሉ የአደጋ መከላከል እና ምግብ ዋስትና ኮሚሽንም፣ 40 በመቶ የርዳታ እህል በጸጥታ ችግር ምክንያት ለማሰራጨት እንዳልተቻለ፣ ባለፈው ሳምንት ለአሜሪካ ድምፅ መግለጹ ይታወሳል፡፡

ዝርዝሩን ከተያያዘው ፋይል ይከታተሉ።

በዐማራ ክልል፣ በ2015/16 መኽር ምርት የተከሠተውን ድርቅ ተከትሎ፣ ከ1ነጥብ5 ሚሊዮን በላይ ለኾኑ ተጎጂዎች የርዳታ እህል እንደተሰራጨ፣ የክልሉ የአደጋ መከላከል እና ምግብ ዋስትና ኮሚሽን አስታወቀ፡፡

ኮሚሽነር ዲያቆን ተስፋው ባታብል፣ ዛሬ ረቡዕ፣ ለአሜሪካ ድምፅ እንደተናገሩት፣ ከፌዴራሉ እና ከክልሉ መንግሥት፣ እንዲሁም ከለጋሽ ድርጅቶች ከተገኘው ድጋፍ 60 በመቶ ያህሉን እንዳሰራጨ ገልጸዋል፡፡ ቀሪው 40 በመቶው ድጋፍ፣ በክልሉ ባለው ወቅታዊ የጸጥታ ችግር ምክንያት ማድረስ እንዳልቻለ ገልጸው፣ ተጎጂዎችን ለመታደግ ርብርብ እንዲደረግ ጥሪ አቅርበዋል፡፡

በሰሜን ጎንደር ዞን በጃን አሞራ ወረዳ “ክልል” በተባለ ቀበሌ የሚኖሩ አርሶ አደሮች፣ በቂ ድጋፍ እንዳላገኙ ለአሜሪካ ድምፅ ተናግረዋል።

ዝርዝሩን ከተያያዘው ፋይል ይከታተሉ።