በኢራንና በሳዑዲ አረቢያ መካከል የተፈጠረው ዲፕሎማሲያዊ ቀውስ ዛሬ ይበልጥ ተካሯል

በኢራንና በሳዑዲ አረቢያ መካከል የተፈጠረው ዲፕሎማሲያዊ ቀውስ ዛሬ ይበልጥ ተካሯል። ቴህራን ከሳዑዲ ታስመጣቸው የነበሩ የንግድ ቁሳቁሶችን በሙሉ አግዳለች።

ሱዑዲ አረቢያ የመን በሚገኘው ኤምባሲ ላይ ያየር ጥቃት ያካሄደችው ሆን ብላ ነው ስትልም ሪያድን ከሳለች።

የኢራን ውጭ ጉዳይ ሚኒስቴር ቃል አቀባይ ሁሴን ጃብር አንሳሪ (Hossein Jaber Ansari) ሲናገሩ፥ በየመን ዋና ከተማ በሰንዓ ኢራን ኤምባሲ ላይ የተፈጸመው ያየር ጥቃት ለዲፕሎማሲያዊ ተልዕኮዎች ጥበቃ እንዲደረግ የሚጠይቀውን ዓለም አቀፍ ህግጋት በሙሉ የጣሰ ነው ብለዋል።

በኤምባሲው ሕንፃና ባንዳንድ ዲፕሎማቶች ላይ ለደረሰው ጉዳት ኃላፊነቱ የሳዑዲ አረቢያ ነው ሲሉም ቃል አቀባዩ አክለዋል። መግለጫቸው ጉዳት የደረሰባቸው የኤምባሲው ሠራተኞች እነማን መሆናቸውን ግን አያብራራም።

ታዋቂ የሺያ ሃይማኖት መሪውን ጨምሮ አርባ ሰባት ሰዎች መገደላቸውን ተከትሎ በበርካታ ሙስሊም ሃገሮች በሳውዲ ንጉሣዊ ቤተሰብ ህዝባዊ ተቃውሞ ሰልፍ ተካሂዷል።