በሞስኮው ጥቃት ተሳትፈዋል በተባሉ ላይ ክስ ተመሠረተ

በሞስኮ አቅራቢያ በመካሄድ ላይ በነበረ አንድ የሙዚቃ ኮንሰርት ወቅት ተኩስ በመክፈት ሰዎችን ገድለዋል የተባሉ አራት ተጠርጣሪዎች ላይ ሩሲያ ትናንት እሁድ ክስ መሥርታለች፡፡

ተጠርጣሪዎቹ የቀድሞው ሶቪዬት ኅብረት አካል የነበረችው ታጂክስታን ዜጎች የሆኑና በሩሲያ የሚኖሩ ግለሰቦች መሆናቸውን የአገሪቱ መገናኛ ብዙሃን ዘግበዋል።

ተጠርጣሪዎቹ በምርመራ ወቅት ክፉኛ መደብደባቸውን ያሳያል የተባለ ቪዲዮ በማኅበራዊ ሚዲያ የተለቀቀ ሲሆን፣ ከፍርድ ቤት በወጡ ቪዲዮዎች እና ፍቶ ግራፎች ደግሞ ክፉኛ ቆስለውና ግራ ተጋብተው ተስተውለዋል።

SEE ALSO:

በሩሲያ የሙዚቃ ድግስ ላይ በተፈፀመ ጥቃት የሞቱት ሰዎች ቁጥር 115 ደረሰ

አራቱ ተጠርጣሪዎች በሽብር ወንጀል እንደተከሰሱ እና ከአራቱ ሶስቱ ለቀረበባቸው ክስ ጥፋተኛ እንደሆኑ መግለጻቸውን በሞስኮ የሚገኘው ፍ/ቤት አስታውቋል።

ተጠርጣሪዎቹ የፍርድ ሂደቱ እስከሚካሄድበት ግንቦት ወር ድረስ ተይዘው እንደሚቆዩም ታውቋል።

ጥቃቱን ተከትሎ፣ በሩሲያ የሞት ፍርድ ተግባራዊ በሚሆንበት ሁኔታ ላይ አንዳንድ ሕግ አውጪዎች በመነጋገር ላይ መሆናቸው ታውቋል።

በጥቃቱ እስከ ትናንት እሁድ ድረስ 137 ሰዎች መሞታቸው ሲታወቅ፣ ከመቶ በላይ ደግሞ ቆስለዋል።