አውሮፓ ኅብረት 8 ቢሊየን ዶላር ለግብፅ ሊሰጥ ነው

በአፍሪካ የበረታው የኢኮኖሚ ጫና እና ግጭቶች ወደ አውሮፓ የሚፈልሱ ስደተኞችን ቁጥር ሊጨምር ይችላል የሚል ስጋት የገባው አውሮፓ ኅብረት፣ የገንዘብ እጥረት ላጋጠማት ግብፅ የ8 ቢሊየን ዶላር የርዳታ ጥቅል እንደሚሰጥ አስታወቀ።

የርዳታ ስምምነቱ የሚፈረመው፣ የአውሮፓ ኅብረት ኮሚሽን ፕሬዚዳንት ኡርሱላ ቮን ደር ሌየን እና የቤልጂየም፣ ጣሊያን፣ ኦስትሪያ፣ ቆጵሮስ እና ግሪክ መሪዎች ግብፅን በሚጎበኙበት ወቅት መሆኑን የግብፅ ባለሥልጣናት አስታውቀዋል።

SEE ALSO:

የአውሮፓ ኅብረት ለግብፅ የ8 ቢሊዮን ዶላር ድጋፍ ይፋ አደረገ

ግብፅ የሚገኘው የአውሮፓ ኅብረት ተልዕኮ በበኩሉ፣ የርዳታ ጥቅሉ ከአረብ ሀገራት ትልቁን የሕዝብ ብዛት ለያዘችው ሀገር፣ በሚቀጥሉት ሦስት ዓመታት ውስጥ የሚሰጥ ርዳታ እና ብድርን የሚያጠቃልል መሆኑን ገልጿል።

ግብፅ ከሚገኘው ተልኮ የተገኘው ሰነድ፣ ሁለቱ ወገኖች ትብብራቸውን ወደ "ስልታዊ እና ሁሉን አቀፍ አጋርነት" ደረጃ ከፍ ማድረጋቸውን እና ይህም ኢኮኖሚያዊ እና ኢኮኖሚያዊ ባልሆኑ መስኮች የግብፅ እና የአውሮፓ ኅብረትን አጋርነት ለማስፋት መንገድ መጥረጉን አመልክቷል።

የአውሮፓ ኅብረት ርዳታውን የሚሰጠው፣ የግብፅ መንግሥት፣ በተለይ ከአፍሪካ እና ከመካከለኛው ምስራቅ ድህነትን እና ግጭቶችን ለሚሸሹ ስደተኞች ዋና መሸጋገሪያ ከሆነችው ሊቢያ ጋራ ያለውን ድንበር እንዲያጠናክር እና፣ በሱዳን ለአንድ ዓመት ለሚጠጋ ጊዜ የሚካሄደውን ጦርነት ሸሽተው የሚሰደዱ ሱዳናውያንን እንዲያስተናግድ ነው።