ብሬት ካቫኖ የዩናይትድ ስቴትስ ጠቅላይ ፍርድ ቤቱ ዳኛ እንዲሆኑ የሕግ ወመሰኛ ምክር ቤቱ ከወሰነና ቃለ መሃላ ከፈፀሙ በኋላ ዋሺንግተን ዲ.ሲ. ላይ የበረታ ቅሬታ እየተሰማ ነው።
በፕሬዚዳንት ዶናልድ ትረምፕ የቀረቡትን ብሬት ካቫኖን ሹመት የሕግ ወመሰኛ ምክር ቤቱ ያፀደቀው ትናንት (ቅዳሜ፤ መስከረም 26/2011 ዓ.ም.) ምሽት ላይ የነበረ ሲሆን ወዲያው በግል በተከናወነ ሥነ-ሥርዓት ቃለ-መሃላ ፈፅመዋል፡፡
በጠቅላይ ፍርድ ቤቱ ሕንፃ ውስጥ የተከናወነውን የ114ኛውን የዩናይትድ ስቴትስ ጠቅላይ ፍርድ ቤት ዳኛ ብሬት ካቫኖን ቃለ-መሃላ ሥርዓት የመሩት የፍርድ ቤቱ ዋና ዳኛ ጃን ራበርትስ እና በጡረታ የተገለሉት አሁን ካቫኖ የሚተኳቸው አማካይ ድምፅ ሆነው ለረዥም ጊዜ እንዳገለገሉ የሚነገርላቸው አንተኒ ኬኔዲ ናቸው፡፡
የሚስተር ካቫኖ ሹመት የፀደቀው ከምክር ቤቱ አባላት እንደራሴዎች የሃምሣውን ድምፅ በማግኘት ነው፡፡
ከሪፐብሊካኑ 49 ሴናተሮች የተቃወመ ማንም ካለመኖሩ በተጨማሪ ካቫኖ አንድ የዴሞክራት ሴናተር ተጨማሪ ድምፅ በማግኘታቸው ነው በሃምሣ ድጋፍና በ48 የዴሞክራቲክ ሴናተሮች ተቃውሞ ያለፉት፡፡
የአላስካ ሪፐብሊካን ሴናተር ሊሳ ሙርኮውስኪ በስብሰባው ላይ ቢገኙም ድምፃቸውን ሳይሰጡ ቀርተዋል። ለካቫኖ ሹመት የይሁንታ ድምፅ የሰጡት ዴሞክራት እንደራሴ የዌስት ቨርጂንያ ሴናተር ጆ ማንቺን ሳልሣዊ ናቸው።
በዚህ ዓይነት በታሪክ እጅግ ጠባብ በተባለ ልዩነት ሹመታቸው የፀደቀላቸው ካቫኖ የጠቅላይ ፍርድ ቤቱ 114ኛ ዳኛ ሆነዋል፡፡
በሚስተር ካቫኖ ሹመት ላይ የተሰጠው ድምፅ ሂደት ተጠናቅቆ ውጤቱ እንደተገለፀ ፕሬዚዳንት ዶናልድ ትረምፕ “እጅግ የሚያስፈነድቅ!” ባሉበት የትዊተር መልዕክት የሕግ ወመሰኛ ምክር ቤቱን እንደሚያደንቁና “እንኳን ደስ አላችሁ” እንደሚሉ ገልፀው ተሰያሚውን ዳኛ “ታላቅ ተመራጭ” ሲሉ ጠርተዋቸዋል፡፡
ዋሺንግተን ዲ.ሲ. የሚገኘው ፌደራል ይግባኝ ሰሚ ችሎት ዳኛ ሆነው የቆዩት ብሬት ካቫኖ “ከሰላሣ ዓመታት በፊት የሁለተኛ ደረጃ ተማሪዎች ሳለን ሊደፍረኝ ሞክሮ ነበር” ባሉ ዶ/ር ክሪስቲን ብሌዚ ፎርድ የሚባሉ የዩኒቨርሲቲ ፕሮፌሰር ውንጀላ ምክንያት እንዲሁም ተከፋፍሎ የነበረው የሕግ መወሰኛ ምክር ቤቱ ከፍተኛ ውዝግብ ውስጥ ገብቶ ቆይቷል፡፡
ጉዳዩን ፌደራሉ የምርመራ ቢሮ እንዲያየው ተወስኖ ኤፍቢአይ ለሁለት ቀናት ያደረገውን ምርመራ ከትናንት በስተያ ሃሙስ ለሴኔቱ አቅርቧል፡፡
ኤፍቢአይ ያደረገው ምርመራ “በቂ አይደለም” በሚልና በዚሁ ክሥ ምክንያት ሚስተር ካቫኖ ለሴኔቱ እማኝነት በሰጡ ጊዜ “አንፀባርቀዋል” በተባለ “ወገንተኛ አስተያየት”ና “ግልፍተኛነት” ጭምር “ለታጩበት ከፍተኛ ወንበር ብቁ አይደሉም” የሚል የበረታ ተቃውሞ ከዴሞክራቶቹና ከሌሎችም ተሟጋቾች ሲነሣባቸው ሰንብቷል፡፡
የውሣኔ ድምፅ ለመስጠት ለከትናንት በስተያ ዓርብ ቀጠሮ ተይዞ የነበረ ቢሆንም በዚሁ እሰጥ አገባ ምክንያት የድምፁን ጉዳይ ለትናንት ማሸጋገሩ ይታወሳል።
በሃገሪቱ ምክትል ፕሬዚዳንት ማይክ ፔንስ ሊቀመንበርነት ድምፀ እየተሰጠ በነበረ ጊዜ በምክር ቤቱ የእንግዶች መቀመጫ ውስጥ የነበሩ ታዛቢዎች ያሰሟቸው በነበሩ “ቅሌት! ቅሌት!” በሚሉ የጩኸት ድምፆች ሂደቱ እየተቋረጠ ለመቀጠል ከመገደዱም በላይ ከውጭም ይስተጋቡ የነበሩ ተመሣሣይ የተቃዋሚ ሰልፈኞች ድምፆች አዳራሹን ዘልቀው ይሰሙ እንደነበረ ተገልጿል፡፡
ፕሬዚዳንት ዶናልድ ትረምፕ ዋይት ሃውስ ከገቡ ባለፉት ሃያ ወራት ውስጥ ዘጠኝ ዳኞች ለዕድሜ ልክ ለሚሰየሙበት ጠቅላይ ፍርድ ቤት የዳኛ ሹመት በተሣካ ሁኔታ ሲያስፀድቁ የዛሬው ሁለተኛቸው ሲሆን ካቫኖ ባላቸው አቋምና እምነት ምክንያት ወግ አጥባቂ ዘመም የሆነ ጠቅላይ ፍርድ ቤት ማፅናት እንደቻሉ ይነገርላቸዋል፡፡
ፕሬዚዳንቱ ዛሬ ባወጡት የትዊተር መልዕክት “ለሰደድ ጫሪ ክብሪት እንዳይሰጡ ሁሉ ለግራ ዘመም ፖለቲከኞችም ሥልጣን አያጎናፅፉም” ሲሉ በውጤቱ የተሰማቸውን እርካታ አሳይተዋል።
ብሬት ካቫኖ የ53 ዓመት ዕድሜ ጎልማሣ ሲሆኑ ቢያንስ ለመጭዎቹ አርባ ዓመታት በጠቅላይ ፍርድ ቤቱ ዳኛነት ሊያገለግሉ እንደሚችሉ ብዙዎች ተንብየዋል፡፡
የፌስቡክ አስተያየት መስጫ