ኢትዮጵያ ጋዜጠኞችን ዝም ለማሰኘት የምትጠቀምበትን አፋኝ ሕጎቿን ካላሻሻለች፣ የመጻፍና የመናገር ነፃነትን የምታፍንበትን የእጅ አዙር አስጨናቂ አካሄድ ካላስተካከለች፤ ጋዜጠኞችን ከእስር መልቀቋ ብቻ ነፃ ሀገር ሊያሰኛት አይችልም ሲል ዋና ቢሮውን በዚህ በዩናይትድ ስቴትስ ያደረገው የጋዜጠኞች ደህንነት ተሟጋቹ ድርጅት ሲፒጄ አስታወቀ።
ሲፒጄ በእስር ላይ የሚገኙ ጋዜጠኞችን ቁጥር ቀምሮ ይፋ በሚያደርግበት ዓመታዊ ሪፖርቱ በአውሮፓውያን ዘመን አቆጣጠር በ2017 በዓለም ዙሪያ 259 ጋዜጠኞች ታስረው እንደሚገኙና ከዚህም ውስጥ ኢትዮጵያ 16 ጋዜጠኞችን በማሰር በአፍሪካ ከግብፅና ከኤርትራ ቀጥሎ ሦስተኛ አፋኝ ሀገር ብሏት ነበር።
በእስር ላይ የነበሩት 16 ጋዜጠኞችና የኢንተርኔት ጸሐፊዎች ከእስር ተለቀዋል። ለመጀመሪያ ጊዜም የኢትዮጵያ እስር ቤቶች ከጋዜጠኞችና ከጸሐፊዎች ነፃ ሆነዋል። የእነዚህ ጋዜጠኞች ከእስር መለቀቅ ኢትዮጵያን ከፕሬስ ነፃነት አፋኝነት የመጀመሪያ ተርታ ውስጥ ያወጣታል ወይ? የሚል ጥያቄ ለጋዜጠኞች ደህንነት ተሟጋቹ ድርጅቱ (ሲፒጄ) የአፍሪካ ቀንድ ተከራካሪ አንጄላ ኲንታል ጥያቄ አቅርቤ ነበር። አጭር መልስ ሰጥተውኛል “በፍፁም አያወጣትም” የሚል።
ምክኒያታቸውን ሲያስረዱ፤ “ጋዜጠኞችና የጦማር ጸሐፊዎችን መፈታት እንደበጎ እመርታ እንመለከተዋለን። የመገናኛ ብዙሃን ነጻነት ግን ጋዜጠኞችን በማሰርና በመፍታት ብቻ አይረጋገጥም። ኢትዮጵያን በተመለከተ የሚያሳስበን በመገናኛ ብዙሃኑ ላይ የተጣለው አፋኝ ሕግ ነው።ለመንግሥቱ የምናቀርበው ጥሪ ቀድሞውኑም ጋዜጠኞቹን ለማሰር የዋለውን ሕግ ማሻሻልና ይሄን ዕድል ተጠቅመው አመቺ ሁኔታዎችን እንዲፈጥሩ ነው።” ብለዋል።
የጋዜጠኞች መብት ተሟጋች ድርጅቱ አጥኝ አንጀላ ኩዊንታል የጠቀሱትና ሊለወጥ ይገባዋል የሚሉት ሕግ ከዘጠኝ ዓመታት በፊት የጸደቀው የጸረ-ሽህብር ህግ ነው። የኢትዮጵያ መንግሥት የሕዝቡን ደህንነት ለማስጠበቅ ያወጣሁት ነው ቢልም፤ የዚህ ሕግ አንቀጾች እየጠተቀሱ ጋዜጠኞች፣ ጸሐፊዎችና የፖለቲካ ተቀናቃኞች ሲታሰሩ መቆየታቸውን ይጠቅሳሉ።
“ከሕግ ማሻሻዎች በተጨማሪም የሚያሳስበን ነጻና ገለልተኛ የመገናኛ ብዙሃን መጥፋት ነው። ባለፉት ሦስት ዓመታት በርካታ የመገናኛ ብዙሃን ተዘግተዋል ወይንም ሕትመታቸውን አቋርጠዋል። እነዚህ የተዘጉ የመገናኛ ብዙሃን አልተከፈቱም። በተደጋጋሚ የኢንተርኔት አግልግሎት መቋረጡና ሌሎች ችግሮችም ይታያሉ።” ያሉት የደህንነት ተሟጋቹ ድርጅቱ (ሲፒጄ) የአፍሪካ ቀንድ ተከራካሪ አንጄላ ኲንታል ናቸው።
(ዝርዝር ዘገባውን ከተያያዘው የድምፅ ፋይል ያድምጡ)
የፌስቡክ አስተያየት መስጫ