ዋሽንግተን ዲሲ —
የዩናትድ ስቴትስ ጦር ሠራዊት ጂሃዲ ጆን (Jihadi John) እየተባለ በሚጠራው አደገኛ እንግሊዛዊ የእስላማዊ መንግሥት ሚሊሽያ ላይ ያነጣጠረ ያየር ድብደባ ማካሄዱን አስታወቀ።
ጂሃዲ ጆን (Jihadi John)በበርካታ ቪዲዮዎች ላይ የምዕራባውያን ታጋዮችን አንገት ሲቀላ ታይቷል።
ምዕራባውያን የስለላ ድርጅቶች መሃመድ ኤምዋዚ (Mohammed Emwazi) መሆኑን የሚገልጹት ነውጠኛ፣ በትላንት ማታው ራቃ ሶርያ (Raqqa, Syria) ውስጥ በተካሄደ የድሮን ጥቃት ስለመገደሉ ግን፣ ባለሥልጣናት ወድያውኑ የሰጡት ማረጋገጫ የለም።
ማንነታቸው እንዳይገለጽ የጠየቁ ከፍተኛ የዩናትድ ስቴትስ ባለሥልጣናት ለበርካታ ብዙሃን እንደተናገሩት ግን መሃመድ ኤምዋዚ (Mohammed Emwazi) የነበረበት ተሽከርካሪ በትክክል የተመታ በመሆኑ ሳይሞት አልቀረም ብለዋል። ዜናውን ከዚህ በታች ካለው ፋይል ያድምጡ።
