ፍሎሪዳ ውስጥ አነስተኛ አውሮፕላን ተከስክሶ ብዙ ሰው ሞተ

ትላንት ሐሙስ ምሽት ላይ በዩናይትድ ስቴትስ ፍሎሪዳ ግዛት ውስጥ አውሮፕላን ተከስክሶ፣ በአውሮፕላኑ ውስጥ የነበሩና አንድ የአካባቢውን ሰው ጨምሮ ብዙ ሰው መሞቱን ባለሥልጣናት ተናገሩ።

አውሮፕላኑ ክሊርዋተር ከተማ ቤይሳይድ በተባለ አካባቢ በሚገኝ አንድ ተንቀሳቃሽ ቤት ላይ በመውደቁ ከነዋሪዎቹ አንዱ ሕይወቱ አልፏል።

አደጋውን ተከትሎ የተነሳው እሳት በፍጥነት ቢጠፋም ቢያንስ ሌሎች ሦስት ቤቶች በተነሳው ቃጣሎ ጉዳት እንደደረሰባቸው፣ የክሊርዋተር የእሳት አደጋ መከላከያ ኃላፊ ስካት ኤህለርስ ስለ አደጋው በሰጡት ጋዜጣዊ መግለጫ ተናግረዋል።

አደጋው ከመድረሱ አስቀድሞ የባለ አንድ ሞተሯ አውሮፕላን አብራሪ ድንገተኛ አደጋ እንዳጋጠመው ለሴንት ፒት ክሊርዋተር ዓለም አቀፍ አውሮፕላን ማረፊያ ማስታወቁን የዩናይትድ ስቴትስ ፌደራል አቪዬሽን አስተዳደር ገልጿል።

አውሮፕላን ማረፊያው ከክሊርዋተር ደቡብ ምስራቅ 10 ኪሎ ሜትር ርቀት ላይ እንደሚገኝ ተገልጿል። የፍሎሪዳ ባለሥልጣናት እና የፌደራል መርማሪዎች አደጋው የደረሰበትን ስፍራ እንደሚመረምሩ ተናግረዋል።