ሩሲያ የዩክሬን ድሮን ጥቃት የነዳጅ ቃጠሎ አስነስቷል አለች

በሩሲያ ስሞልንስክ ክልል ተመትቶ የተጣለ የዩክሬን ሰው አልባ አውሮፕላን (ድሮን) ስብርባሪው የነዳጅ ተቋም ላይ በመውደቁ ቃጠሎ ማስነሳቱን የሩሲያ ባለሥልጣናት ዛሬ ማክሰኞ ተናገሩ።

የሩሲያ የመከላከያ ሚኒስቴር በስሞልንስክ ተመተው የወደቁትን 10 ድሮኖች ጨምሮ በአጠቃላይ 68 የዩክሬን ሰው አልባ አውሮፕላኖችን መትቶ መጣሉን አስታውቋል፡፡

በብራያንስክ፣ ክሬሚያ፣ ክራስኖዶር፣ ቴቨር፣ ሮስቶቭ፣ ኩርስክ እና ካልጋ ክልሎች ውስጥ የተሰማሩ ድሮኖች መምከናቸውንም ሚኒስቴሩ ገልጿል።

“በጥቃቱ ሌላ ምንም ዐይነት ጉዳት እና ውድመት አልደረሰም” ሲልም ሚኒስቴሩ አክሏል።

ይህ በእንዲህ እንዳለ፣ በኪቭ እና ሱሚ ክልሎች ላይ ያነጣጠረ የሩሲያ የሚሳይል ጥቃት መፈጸሙን የዩክሬን ባለሥልጣናት ዛሬ ማክሰኞ ተናግረዋል።

የዩክሬን ጦር፣ ሩሲያ በአንድ ሌሊት ከተኮሰቻቸው 21 ሚሳይሎች ውስጥ ስድስቱን መትቶ መጣሉን እና፣ ከ40 የሩስያ ድሮኖች 16ቱን ማውደሙን አስታውቋል።

የኪቭ ከተማ ወታደራዊ አስተዳደር ኃላፊ የሆኑት ሰርሂ ፖፕኮ "ከተመቱት ሚሳይሎች የወዳደቁ ፍርስራሾች ዩክሬን ዋና ከተማ በሚገኙ ሶስት ሕንፃዎች ላይ ጉዳት አድርሰዋል" ብለዋል።

በሰሜን ምስራቅ ዩክሬን በሚገኘው ሱሚ ክልል፣ የተፈጸመው የሚሳይል ጥቃት “በሾስትካ ከተማ የመሠረተ ልማት ቦታዎች ላይ ያነጣጠረ ነው” ሲሉም ባለሥልጣናቱ ተናግረዋል፡፡