ዩናይትድ ስቴትስ በአሉሚነምና በብረት ምርቶች የጣለቻቸው አዳዲስ ታሪፎች

ዩናይትድ ስቴትስ በአሉሚነምና በብረት ምርቶች ላይ በመላ ዓለም በጣለቻቸው አዳዲስ ታሪፎች ምክንያት ለደረሰባት ጉዳት ማካካሻ እንድትከፍል ሩሲያ ጠየቀች።

164 አባል ሃገሮች ካሉት ዓለም የንግድ ድርጅት ኃያል አቅም ያላቸው ምጣኔ ሃብቶች አንዷ ነች የምትባለው ሩሲያ እንዲህ ዓይነቱን ጥያቄ ስታቀርብ ሦስተኛዋ ሃገር መሆኗ ታውቋል።

ቻይና፣ የአውሮፓ ኅብረትና ሕንድም ዋሺንግተን የወሰደችውን የአዲስ ታሪፍ እርምጃ የሃገር ውስጥ ምርቶችን ከገቢ ንግድ ለመከላከል ስትል ያደረገችው መሆኑን በመግለፅ የተቃወሙት ሲሆን እንዲህ ዓይነቱ አድራጎት በዓለሙ የንግድ ድርጅት ውል መሠረት ታሪፍ ጣዩ ሃገር ካሣ እንዲከፍል የሚያስገድድ መሆኑ ተገልጿል።

ከዚያ ሃሣብ ጋር እንደማይስማማ የሚገልፀው የትረምፕ አስተዳደር ግን ታሪፉን የጣለው በብሄራዊ ደኅንነት ምክንያቶች መሆኑን እያሳወቀ ነው።

የሩሲያ ጥያቄ በዓለሙ የንግድ ደርጅት ተቀባይነት ያግኝ አያግኝ ገና ግልፅ አይደለም።