ኢትዮጵያ በቅርቡ የጀመረችውንና አሁንም እየሠራችበት ያለችበትን የምጣኔ ኃብት ማሻሻያዎች እርምጃና እየተሟሟቁ ያሉትን የንግድና ኢንቨስትመንት ዕድሎች ለማስተዋወቅ የታሰበ መድረክ መሆኑን የውጭ ጉዳይ መሥሪያ ቤቱ አስታውቋል።
በዚህ በዩናይትድ ስቴትስ መንግሥት ደረጃ ሲዘጋጅ በዓይነቱ እጅግ አልፎ አልፎ በሚታየው ከዓለም ሃገሮች አንድ ሃገር ላይ አተኩሮ በሚካሄድ መድረክ ላይ የኢትዮጵያ ጠቅላይ ሚኒስትር ፅሕፈት ቤት አማካሪ ሚኒስትር ዶ/ር አርከበ እቁባይ እና በዩናይትድ ስቴትስ የኢትዮጵያ አምባሳደር ፍፁም አረጋ ሃገሪቱ ውስጥ እየተካሄዱ ባሉ ለውጦችና ለግል መዋዕለ-ነዋይ እየተከፈቱ ባሉ መስኮች ላይ ማብራሪያዎችን ሰጥተዋል።
ኢትዮጵያን የአፍሪካ የምጣኔ ኃብት መናኸሪያ ለማድረግ በተያዘው ዕቅድ በግብርና፣ በመሠረተ-ልማት፣ በኢነርጂ፣ በአምራች ኢንዱስትሪዎችና በአገልግሎት ዘርፎች መስኮቹ መከፈታቸውን፣ የአሠሪና ሠራተኛ ሕግም እየተሻሻለ መሆኑን ኢትዮጵያዊያኑ ባለሥልጣናት አመልክተው ለመዋዕለ-ነዋይ አፍሳሾች የቀለለ ሁኔታ ለመፍጠር የኢንቨስትመንት ኮሚሽኑ የከፈተውን ማጉላላትና ምልልስን የሚያስወግድ አሠራርም አስተዋውቀዋል።
ኢትዮጵያ የገባችበትን የለውጥ መንገድ በመክፈቻ ንግግራቸው ላይ አድንቀው የተናገሩት የዩናይትድ ስቴትስ የውጭ ጉዳይ የአፍሪካ ጉዳዮች ረዳት ሚኒስትር ቲቦር ናዥና በኢትዮጵያ የዩናይትድ ስቴትስ አምባሳደር ማይክ ራይነርም ኢትዮጵያ ምጣኔ ኃብቷን ለማሳደግና ለመሸጋገር የያዘችው እንቅስቃሴ የተሣካ እንዲሆን ሃገራቸው ማንኛውንም እገዛ እንደምታደርግ እነርሱም በየግላቸው የሚቻላቸውን ሁሉ ከማድረግ እንደማይቦዝኑ ተናግረዋል።
የፌስቡክ አስተያየት መስጫ