እስራኤል እና ሀማስ ነገ ሦስት ታጋቾች እና ዘጠና ፍልስጥኤማዊያን እሥረኞች ልውውጥ ያደርጋሉ

በጋዛው የተኩስ አቁም መሠረት ነገ ቅዳሜ በሚከናወነው አራተኛው የታጋቾች እና የእሥረኞች ልውውጥ እሥራኤል ዘጠና ፍልስጥኤማዊያን እሥረኞች እንደምትለቅ ተገለጸ። ሀማስ በበኩሉ ሦስት ታጋቾችን እንደሚለቅ አንድ የፍልስጥኤም ተሟጋች ቡድን ተናግሯል።

እሥራኤል ከምትለቃቸው ፍልስጥኤማዊያን መካከል ዘጠኙ የዕድሜ ልክ እሥራት የተፈረደባቸው ሲኾኑ ሰማኒያ አንዱ ደግሞ የብዙ ዓመት እሥራት ቅጣት የተሰጣቸው እንደሆኑ የፍልስጥኤማዊያን እሥረኞች ክበብ የተባለው ቡድን ቃል አቀባይ አመልክተዋል።

ኪት ሲግል፥ ያርደን ቢባስ እና ኦፈር ካልደሮን የተባሉ ታጋቾች ነገ እንደሚለቀቁ የእስራኤል ባለስልጣናት እና ሃማስ አስታውቀዋል።

የታጋቾች ቤተሰቦች መድረክ የተባለው ቡድን በታጋቾቹ መለቀቅ ዜና መደሰቱን ገልጿል።

ትላንት ሐሙስ ሃማስ ስምንት ታጋቾችን ሲለቅ እስራኤልም 110 ፍልስጥኤማዊያን ለቃለች።