እስራኤል ደማስቆ ላይ የአየር ጥቃት አደረሰች፦ሶሪያ

እስራኤል በዋና ከተማዬ ደማስቆ የሚገኝ አንድ የመኖሪያ ቤት ህንፃ ላይ የአየር ጥቃት ፈፅማለች ስትል ሶሪያ አስታወቀች።

የሶሪያ መንግሥት መገናኛ ብዙሀን ዛሬ ረቡዕ ባወጡት ዘገባ “ጥቃቱ የተፈፀመው “ከፋር ሶሴህ” በተባለው የፀጥታ እና ወታደራዊ ተቋማት ዋና ፅህፈት ቤቶች የሚገኙበት አካባቢ ነው” ብለዋል።

ከቅርብ ዓመታት ወዲህ ሶሪያ ላይ በርካታ የአየር ድብደባዎችን ሲያካሂድ የነበረው የእስራኤል ጦር ስለደረሰው ጥቃት ምንም ዐይነት መግለጫ አልሰጠም።

ጥቃቶች አደረሰች መባሏን ብዙ ጊዜ የማትቀበለው እስራኤል ሶሪያ ውስጥ የምትወስደው ርምጃ ግን በኢራን የሚደገፉ ኃይሎች ላይ ያነጣጠረ መሆኑን ተናግራለች።

ባለፈው ዓመት የካቲት ወር ውስጥም ተመሳሳይ የአየር ድብደባ በዚሁ ዛሬ ጥቃት በተፈፀመበት አካባቢ የተካሄደ ሲሆን በርካታ የኢራን ወታደራዊ ባለሙያዎችን ገድሏል።