የታገቱትን ለማስለቀቅ ከሚደረገው የእስራኤል ወታደራዊ ዘመቻ ጋር ተያይዞ በተፈጸመው የአየር ጥቃት ቢያንስ 50 ሰዎች መገደላቸውን ደቡባብዊ ጋዛ ራፋህ ከተማው ውስጥ የሚገኙ የሆስፒታል ባለሥልጣናት ተናገሩ፡፡
የአቡ የሱፍ አል ናጃር ሆስፒታል ዳይሬክተር ዶ/ር አቡ ማርዋን አል-ሐምስ ዛሬ ሰኞ እንደተናገሩት ከሟቾቹ መካከል ሴቶች እና ህጻናት ይገኙበታል።
በራፋህ አቡ ዩሱፍ አል-ናጃር የማቾች ቤተሰቦች በአስክሬኖቹ ላይ ተደፍተው በሚያለቅሱበት ሆስፒታል ውስጥ የራሱ ጋዜጠኛ ቢያንስ 50 አስከሬኖችን መቁጠሩን አሶሴይትድ ፕሬስ ዘግቧል፡፡
የእስራኤል ኃይሎች ዛሬ ሰኞ ማለዳ ላይ ጋዛ ውስጥ ከፍተኛ ጥበቃ የሚደረግለት አንድ የአፓርትመት ህንጻ በመውረር በተኩስ ልውውጥ መካከል ሁለት ታጋቾችን ማስለቀቅ መቻላቸውን ዘገባው አመልክቷል፡፡
ምንም እንኳ የተለቀቁት የታጋቾቹ ቁጥር አነስተኛ ቢሆንም ለእስራኤል ስኬት ትልቅ ማሳያ ነው ተብሏል፡፡
መሃመድ ዞሮብ የተባሉት የአካባቢው ነዋሪ ለአሶሴይትድ ፕሬስ ሲናገሩ “ በአካባቢው ግጭት ነበር በሁሉም አቅጣጫ ይካሄድ ከነበረው የአየር ጥቃት ለማምለጥ ልጆቻችንን ይዘን እንሯሯጥ ነበር “ ብለዋል፡፡
“ወደ ቀኝም ሆነ ወደ ግራ ብንሄድ ከ17-18 በላይ የሚደርሱ የአየር ጥቃቶች ተካሂደዋል” ሲሉም ነዋሪው አክለዋል፡፡
የእስራኤል እግረኛ ኃይሎችን የደገፈው የአየር ጥቃት የተጨናነቀውን የራፋ አካባባቢ ያጠቃው ከእኩለ ሌሊት ጀምሮ ሲሆን፣ ከሌሊቱ ስምንት ሰዓት ግድም ላይ በአካባቢው በርካታ ፍንዳታዎች የተሰሙ መሆኑ ተዘግቧል፡፡
በጋዛ የሚገኘው የሐማስ ጤና ሚኒስቴር ቃል አቀባይ አሽራፍ አልቂድራ በአየር ጥቃቱ ቢያንስ 67 ሰዎች መገደላቸውን ተናግረዋል፡፡
የእስራኤል ጦር ቃል አቀባይ ሪድ አድሚራል ዳንኤል ሃጋሪ በአየር ኃይሉ የተደገፈው ልዩ ኃይሉ በተኩስ መካከል ሁለተኛው ፎቅ ወደ ሚገኘው አፓርትመንት በማምራት በሐማስ ቁጥጥር ሥር የነበሩ ሁለቱን ታጋቾች ማስለቀቃቸውን ተናግረዋል፡፡
የ60 እና የ70 ዓመት እድሜ እንዳላቸው የተነገረላቸው ታጎቾች ባላፈው ጥቅምት ወር በሐማስ ከታገቱት 250 ሰዎች መካከል መሆናቸውን ዘገባው አመልክቷል፡፡
መድረክ / ፎረም