የጋዛ ተኩስ አቁምን ዳር ለማድረስ ድርድሩ ቀጥሏል

ዩናይትድ ስቴትስ ሀማስ በርከት ያሉ ያሉ የማሻሻያ ሃሳቦችን ማቅረቡን ተከትሎ የጋዛ ተኩስ አቁም ሃሳቡን ዳር ለማድረስ ጥረት ማድረጓን ቀጥላለች፡፡

የኋይት ሐውስ የብሔራዊ ጸጥታ አማካሪ ጄክ ሰለቫን ዛሬ ሐሙስ ለጋዜጠኞች በሰጡት ቃል ሃማስ ያቀረባቸው አንዳንዶቹ ጥያቄዎች “መለስተኛ እና ጥቃቅን “ ስለሆኑ ሊሠራባቸው የሚቻሉ ናቸው ብለዋል፡፡ ሌሎቹ ደግሞ ፕሬዚደንት ጆ ባይደን በዝርዝር ካቀረቡዋቸውም ሆነ በተመድ የጸጥታ ምክር ቤት ከጸደቁት ማዕቀፎች ጋር የሚጣጣሙ አይደሉም ሲሉም አክለዋል፡፡ ድርድሮቹ በግብጽ እና በካታር ባለስልጣናት አማካይነት በተዘዋዋሪ የሚካሄድ እንደመሆኑ ጊዜ እንደሚወስድ እንዲጤን ጄክ ሰለቫን አሳስበዋል፡፡

“እኛ ከካታር እና ከግብጽ ጋር እንሠራለን፡፡ ካታር እና ግብጽ ደግሞ ከሐማስ ጋር ይሠራሉ፡፡ ዩናይትድ ስቴትስ ደግሞ ከእስራኤል ጋር ትሠራለች፡፡ ዓላማችን በተቻለ ፍጥነት ለማጠናቅቅ ነው ብለዋል” ጄክ ሰለቫን፡፡

ይህ በእንዲህ እንዳለ የእስራኤል የጦር ኅይል በመላዋ ጋዛ ባሉ አርባ አምስት ዒላማዎች ላይ የአየር ጥቃት ማካሄዱን አስታውቋል፡፡ በተጨማሪም በደቡባዊ ጋዛ ራፋህ አካባቢ በምድር ጦር እና በአየር ጥቃት ማድረሱ በማዕከላዊ ጋዛ ሰርጥም ጥቃቶች ማካሄዱን ገልጿል፡፡