ፍልስጤማውያን "በጋዛ ት/ቤት የተጠለሉ 27 ሰዎች በእስራኤል ጥቃት ተገድለዋል" አሉ

እስራኤል ጋዛ ውስጥ ፍልስጤማውያን ተፈናቃዮች በተጠለሉበት ትምህርት ቤት ላይ ዛሬ ሐሙስ በፈጸመችው የአየር ጥቃት 27 ሰዎች ተገድለዋል" ሲሉ ፍልስጤማውያን ባለሥልጣናት አስታወቁ፡፡

እስራኤል "ጥቃቱ ትምህርት ቤቱ ውስጥ የመሸገውን የታጣቂዎች የዕዝ ማዕከል ኢላማ ያደረገ ነው" ብላለች፡፡

የተባበሩት መንግሥታት ድርጅት "እስራኤል በደቡብ ሊባኖስ በሚገኘው የሰላም አስከባሪ ይዞታ ላይ በመተኮስ ሁለት አባላትን አቁስላለች" ሲል ከሷታል፡፡

እስራኤል ክስተቱን እየመረመረች መሆኑን አስታውቃለች፡፡

የእስራኤል ጦር ቀደም ሲል ከሊባኖስ ለተተኮሰው የሚሳይል ጥቃት ምላሽ ለመስጠት አህመድ ሙስጠፋ አል ሃጅ አሊ እና መሀመድ አሊ ሃምዳን የተባሉ ሁለት የሂዝቦላህ አዛዦችን የገደለበትን የአየር ድብደባ መፈጸሙን አስታውቋል፡፡

ከእስራኤሉ ጠቅላይ ሚኒስትር ኔታንያሁ ጋር ትላንት ረቡዕ በስልክ የተነጋገሩት የይናይትድ ስቴትስ ፕሬዚደንት ጆ ባይደን፣ ለእስራኤል “የማይናወጥ ጠንካራ” ድጋፋቸውን በድጋሚ ያረጋገጡ ሲሆን በሃማስ የተያዙ ታጋቾችን ለማስፈታት በሚደረገው ጥረት ላይ ተወያይተዋል።

ሁለቱ መሪዎቹ ቴህራን እኤአ በጥቅምት 1 ቀን 200 ባሊስቲክ ሚሳይሎችን ወደ እስራኤል መተኮሷን ተከትሎ ጦርነቱ ስላስከተለው ሰብአዊ ተፅዕኖ እና እስራኤል ለኢራን ልትሰጥ ስለምትችለው ምላሽ ተወያይተዋል።

ባይደን እና ኔታኒያሁ ያደረጉት የስልክ ውይይት እአአ ከነሀሴ 21 ወዲህ የመጀመሪያቸው ነው፡፡ በስልክ ውይይቱ ምክትል ፕሬዚደንት ከማላ ሃሪስም መሳተፋቸውን ኋይት ሐውስ አስታውቋል፡፡