በአይቮሪኮስት የእርስ በርስ ጦርነት ለተወነጀሉ በተሰጠ ምህረት ሲሞን ባግቦ ይገኙበታል

የአይቮሪኮስት ፕሬዚዳንት አላሳን ዋታራ ከሰባት ዓመታት በፊት የብዙ ሰዎች ደም ካፋሰሰው የእርስ በርስ ጦርነት በተያያዙ ጥፋቶች ለተወነጀሉ ሰዎች ትናንት በሰጡት ምህረት ተጠቃሚዎች መካከል አንዷ የቀድሞ የሀገሪቱ ቀዳማዊት እመቤት ሲሞን ባግቦ መሆናቸው ታወቀ።

ሲሞን ባግቦ በብጥብጡ በተጫወቱት ሚና የሀገር ደኅንነትን አደጋ ላይ በመጣል ወንጀል ተከሰው በሃያ ዓመት እሥራት እንዲቀጡ ተፈርዶባቸው እንደነበር ይታወሳል። ባለፈው ዓመት ደግሞ በሰብዓና ላይ ወንጀል በመፈፀም በተመሰረተባቸው ክስ ከወንጀሉ ነፃ ተብለዋል።

አቃቤ ሕጎች በወቅቱ የሀገሪቱ ፕሬዚዳንት ሎራን ባግቦ ተቃዋሚዎች ላይ የበቀል ጥቃት የሚፈፅም ቡድን አድራጅተው የጦር መሳሪያና ሄሊኮፕተርም ጭምር እየሰጡ ሲንቀሳቀሱ ነበር ብለው ወንጅለዋቸዋል።

ሎራን ባግቦ በፕሬዚዳንታዊ ምርጫ በአላሳን ዋታራ መሸነፋቸውን አልቀበልም ካሉ በኋላ አአአ በ2011 በተቀሰቀሰው ብጥብጥ ቁጥራቸው ወደ ሦስት ሺህ የሚጠጋ ሰዎች ተገድለዋል። ያን ተከትሎ ተይዘው ለሄጉ የዓለምቀፍ ወንጀል ፍርድ ቤት ተሰጥተው በሰብዕና ላይ ወንጀል በመፈፀም ክስ ሂደት ላይ ናቸው።