ጠቅላይ ሚኒስትር ዐቢይ አህመድ ዛሬ በትዊተር ገጻቸው ባወጡት መግለጫ ከኢሚሬትስ የታዳሽ ኃይል ኩባኒያ ማስዳር ጋር በፀሐይ ኃይል 500 ሜጋዋት የኤሌክትሪክ ኃይል ማመንጫ ለመገንባት ሥምምነት መፈረሙን አስታውቀዋል።
ሥምምነቱ የጠቅላይ ሚኒስትር ዐቢይ ቁልፍ የኢንዱስትሪ ግንባታ ትልም በሆነው መሰረት የኢትዮጵያን የኤነርጂ አቅም በከፍተኛ ደረጃ ሊያሳድግ እና የኤነርጂ ምንጮቹን አይነት ለማስፋፋት የሚጠቅም እንደሚሆን ሮይተርስ ዘግቧል።
የፀሐይ ኃይል ኤነርጂ ማመንጫ ጣቢያው በምን ያህል ወጪ እንደሚገነባም ሆነ የት እንደሚገነባ ጠቅላይ ሚኒስትሩ በዝርዝር እንዳላሳውቁ ሮይተርስ አመልክቶ ከጠቅላይ ሚኒስትር ጽህፈት ቤት ቃል አቀባይ ቢል ለኔ ስዩምም ሆነ ከኤሚሬትሱ ማስዳር ኩባኒያ ማብራሪያ ማግኘት እንዳልቻለ ጠቅሷል።
