በጊኒ ዋና ከተማ የደረሰው ፍንዳታ ከፍተኛ የነዳጅ እጥረት አስከተለ

በጊኒ ዋና ከተማ ኮናክሪ በሀገሪቱ ዋና የነዳጅ ማከማቻ ላይ ባላፈው ሰኞ የደረሰውን ከባድ ፍንዳታ ተከትሎ ነዋሪዎች ለከፍተኛ የትራንስፖርት ወጪ መጋለጣቸው ተነገረ፡፡

የ18 ሰዎችን ህይወት የቀጠፈው እና ከ200 በላይ የሚሆኑትን ለአካል ጉዳት የዳረገው ይህ ክስተት የከተማዋን የነዳጅ አቅርቦት በከፍተኛ ደረጃ አቋርጧል።

ፍንዳታው ባስከተለው የነዳጅ እጥረት በህዝብ ማመላለሻ ላይ ከፍተኛ ጉዳት መድረሱ ተመልክቷል፡፡

በፍንዳታው ሳቢያ 5 ዶላር ያህል የነበረው የትራንስፖርት ዋጋ በአንድ ጊዜ ወደ 32 ዶላር ከፍ ማለቱን ነዋሪዎችን የጠቀሰው የአሶሴይትድ ፕሬስ ዘገባ አመልክቷል፡፡

የመንግሥት ቃል አቀባይ ኦስማኔ ጓውል ዲያሎ ቃጠሎው 738 አባወራዎችን ለጉዳት መዳረጉን ተናግረዋል፡፡

በፍንዳታ ሳቢያ የተነሳው ቃጠሎ ለ24 ሰዓታት ያህል ሳይጠፋ የቆየ ሲሆን ሴኔጋል እና ማሊን ጨምሮ ጎረቤት ሀገራት የእሳት አደጋ መከላከል ቡድኖቻቸውን ወደ ስፍራው መላካቸውን ተዘግቧል፡፤

መንግስት የፍንዳታው መንስኤ ምን እንደሆነ በማጣራት ላይ እንደሆነ ተነግሯል፡፡