የጣሊያን ፖሊስ ከአውሮፓ ህብረት ፖሊስ፣ ከብሪታኒያና ኔዘርላንድስ ፖሊሶችና ከዓለም አቀፍ ወንጀል ፍርድ ቤት ጋር በመተባበር በህገወጥ የሰዎች ዝውውር ተፈላጊ የነበረውን ኤርትራዊ ገ/መድህን ተመስገን ገብሩን ትናንት ማክሰኞ አዲስ አበባ ላይ መያዙን አስታውቋል፡፡
የሰላሳ አምስት ዓመቱ ገ/መድህን የተያዘው በአዲስ አበባ አውሮፕላን ማረፊያ በአውስትራሊያ ፓስፖርት ወደ አውስትራሊያ አደሌድ ከተማ በሚጓዝ አውሮፕላን ተሳፍሮ ሊሄድ ሲሞክር መሆኑ ተገልጿል፡፡
ገ/መድህን የታሰረው ኢትዮጵያውያን፣ ኤርትራውያን እና ሱዳናውያን ስደተኞችን በሊቢያ በኩል ወደ ጣሊያን፣ ብሪታኒያ፣ ዴንማርክ፣ ጀርመን፣ ቤልጂየም እና ኔዘርላንድስ በህገወጥ መንገድ በማስተላለፍ ወንጀል መሆኑን የጣሊያን ፖሊስ ተናግሯል፡፡
