በቱኒዚያ ፍልሰተኞች አሻጋሪው በቁጥጥር ሥር ዋለ

ፍልሰተኞችን በሜዲትሬንያን ባህር ላይ የሚያሻግር ሕገ ወጥ ቡድን አደራጅ ነው በሚል የተጠረጠረን ግለሠብ በቁጥጥር ሥር ማድረጓን ቱኒዚያ ትናንት አስታውቃለች፡፡

ከጣልያን ላምፔዱሳ ደሴት 130 ኪ. ሜ. ርቀት ላይ የምትገኘው ቱኒዚያ፣ ወደ አውሮፓ መሻገር ለሚሹ ፍልሰተኞች ተመራጭ አቋራጭ ነች፡፡

ግለሰቡ 24 በሚሆኑ ክሶች ተከሶ፣ በሌለበት የ79 ዓመት እስራት ተፈርዶበት ነበር።

ከአገሪቱ ወደ አውሮፓ ለሚደረገው ሕገ ወጥ ጉዙ ዋና አስተባባሪ እንደነበር የቱኒዚያ የአገር ውስጥ ጉዳይ ሚኒስትር አስታውቀዋል።

ባለፈው መስከረም ባህር ላይ ለሰመጡት 20 የሚሆኑ ቱኒዚያውያን ዕልፈትም ተጠያቂ መሆኑን የአገሪቱ የባህር ድንበር ጠባቂ ኃይል አስታውቋል።

የአውሮፓ ኅብረት የድንበር ቁጥጥር ድርጅት እንደሚለው፣ በሜዲትሬንያን በኩል ወደ አውሮፓ የሚደረገው ጉዞ በ300 እጥፍ ማደጉንና፣ 42 ሺሕ 200 ፍልሰተኞች መግባታቸውን ስታውቋል።