በማዕከላዊ ሶማሊያ የሸበሌ ወንዝ ሞልቶ አካባቢውን በማጥለቅለቁ በተከሰተ የጎርፍ አደጋ 200,000 ሰዎች መፈናቀላቸውን የክልሉ ባለስልጣን አስታወቁ።
በሂራን ክልል፣ ቤልደወይን ከተማ የዘነበው ዝናብ፣ በከተማዋ የሚኖሩ ነዋሪዎች ቤታቸውን ጥለው እንዲወጡ እና በጎርፍ በተጥለቀለቁ ጎዳናዎች ላይ እቃቸውን በጭንቅላታቸው ተሸክመው መጠለያ ፍለጋ እንዲጓዙ አድርጓቸዋል።
"የሸበሌ ወንዝ ሞክቶ ቤልደወይን ከተማን በማጥለቅለቁ ወደ 200 ሺህ የሚጠጉ ሰዎች ተፈናቅለዋል" ያሉት የሂራን ክልል ምክትል አስተዳዳሪ ኦስማን ሁሴን፣ ቁጥሩ ሊጨምር እንደሚችል አመልክተው፣ ተፈናቃዮቹን ለመርዳት የተቻለው ሁሉ እየተደረገ መሆኑን ገልፀዋል።
አክለውም በጎርፉ አደጋ እስካሁን ሶስት ሰዎች መሞታቸውንም አመልክተዋል።
ይህ የጎርፍ አደጋ የደረሰው ከዚህ በፊት ታይቶ የማያውቅ ድርቅ በሚሊየን የሚቆጠሩ ሶማሌዎችን ለረሃብ ባጋለጠበት እና ሀገሪቱ ላለፉት አስርት አመታት ከእስላማዊ ታጣቂዎች ጋር ትግል እያደረገች ባለችበት ወቅት ነው።
