የአፍሪካ ኅብረት የምርጫ ታዛቢዎችን ወደ ናይጄሪያ ሊልክ ነው

ከአስር ቀናት በኋላ በናይጄሪያ የሚደረገውን ምርጫ እንዲታዘቡ ዘጠና አባላት ያሉትን የታዛቢ ቡድን እንደሚልክ የአፍሪካ ኅብረት ኮሚሽን ዛሬ ማክሰኞ አስታውቋል።

በአፍሪካ በህዝብ ብዛት ቀዳሚ የሆነችው ናይጄሪያ በመጪው የካቲት 18 ቀን ምርጫ ለማድረግ ዕቅድ ብትይዝም በነዳጅና በገንዘብ ዕጥረት ምክንያት ቅውስ ውስጥ ገብታለች።

የአፍሪካ ኅብረቱ የምርጫ ታዛቢ ልዑክ የሚመራው በቀድሞው የኬንያ ፕሬዝደንት ኡሁሩ ኬንያታ ነው። ኬንያታ በሰሜን ኢትዮጵያ ለሁለት ዓመታት የተካሄደው ጦርነት ቆሞ ስምምነት ላይ እንዲደረስ በሽምግልና ከተሳተፉት አንዱ ሲሆኑ፣ በምሥራቅ ኮንጎ ዲሞክራቲክ ሪፐብሊክ ያለው ግጭት እንዲቆምም በማሸማገል ላይ ናቸው።

ኅብረቱ እንዳለው የልዑኩ ዓላማ ትክክለኛና ገለልተኛ የሆነ ግምገማ ለማድረግ፣ መሻሻል ያላባቸው ጉዳዩች ካሉ ሃሳብ ለመሠንዘር፣ እንዲሁም በናይጄሪያ ዲሞክራሲ፣ ሠላም፣ መረጋጋትና ልማት እንዲጠናከር ለማገዝ ነው።

ናይጄሪያ በጸጥታ እጦትና በኢኮኖሚ ድቀት ቀውስ በምትተራመስበት ግዜ በሚካሄደው ምርጫ 100 ሚሊዮን የሚሆኑ ሰዎች ድምጻቸውን እንደሚሰጡ የሚጠበቅ ሲሆን፣ ለሁለት የሥልጣን ዘመን አገሪቱን የመሩትን ሞሃማዱ ቡሃሪን የሚተካ መሪ ይመርጣሉ።