የዩናይትድ ስቴትስ የህግ መወሰኛ ምክር ቤት አባላት ከዩክሬንን ፕሬዚደንት ጋር ተነጋገሩ

የዩናይትድ ስቴትስ የተወካዮች ምክር ቤት አፈጉባኤ ናንሲ ፔሎሲ፣ እና አራት ዴሞክራት የኮንግረስ አባላት የዩክሬንን መናገሻ ከተማ ኪቭን ቅዳሜ ዕለት ጎብኝተዋል ።ከዩክሬንን ፕሬዚደንት ቭሎድሜር ዘለንስኪ ጋር ተገናኝተውም ተነገራርዋል ።

ጉብኝቱ ዩክሬንን ለነጻነት ስለምታደርገው ፍልሚያ ለማመስገን፣ ፍልሚያው እስኪጠናቀቅ ዩናይትድ ስቴትስ ያላትን የድጋፍ ቁርጠኝነት ለማረጋገጥ ያለመ መሆኑን ፔሎሲ ለዘለንሲክ ነግረዋቸዋል ።

ከፔሎሲ ጋር ወደ ዩክሬን ያቀኑት ፣ የህዝብ እንደራሴዎች - የካሊፎርኒያው አዳም ሼፍ፣ የማሳቹሴቱ ጂም ማክገቨርን ፣ የኒዮርኩ ግሪጎሪ ሚክስ እና የኮሎራዶው ጄሰን ክሮ ናቸው ።

ይህ በእንዲህ እያለ ቅዳሜ ዕለት በኦዴሳ የአየር ማረፊያ ላይ በደረሰ የሩሲያ የሚሳኤል ጥቃት የአየር ማኮብኮቢያው ጎዳና መውደሙን የዩክሬን ጦር ይፋ አድርጓል ።

ለሲኤን ኤን ኤን ምስክርነቷን የሰጠች አንድ ግለሰብ ፣በደቡባዊቷ ከተማ ሰማይ ላይ ቢያንስ አንድ ተዋጊ አውሮፕላን መመልከቷን ፣ የአደጋ ጊዜ ደዋል ከተሰማ በኃላ መላ ከተማዋ በፍንደታ መናጧን ተናግራለች ።

ሩሲያ የዩክሬንን ምስራቃዊ የዶንባስ ቀጠና ብትደበድብም ሶስት ያነጣጠረችባቸውን ስፍራዎች ማለትም ፣ ሊማን፣ ሲቨርዶንቴስክ እና ፖፕሳናን ለመቆጣጠር እንደተሳናት የዩክሬን ጦር አስታውቋል።