አሜሪካ ማለት ‘ዓለም ማለት ነው’ - ራበርት ሆርማትዝ

ዋሺንግተን ዲ.ሲ. —  ​





“የሃሣብና የተግባር መገናኛ ሥፍራ” በሚል መርህ ዋሽንግተን ዲሲ ላይ እየተካሄደ ያለው ሦስተኛው የዓለም ዳያስፐራ መድረክ የሁለተኛ ቀን ስብሰባውን ቀጥሏል፡፡
ስብሰባው በዛሬው ውሎው ከተለያዩ ሃገሮች ወደአሜሪካ ገብተው በረዥም ጉዟቸው ስኬታማና ታዋቂ የሆኑ ሰዎችን ታሪኮች ከራሣቸው አንደበት አዳምጧል፡፡
ዓለምአቀፏ ሱፐር ሞዴል - ኢትዮጵያዊቷ ሊያ ከበደ፣ በማራቶን የኦሊምፒክ ሜዳሊስቱ፣ የኒው ዮርክ ማራቶን አሸናፊውና በጎ አድራጊው ኤርትራዊው መብ ክፍለዝጊ፣ ከአንዲት የቱርክ መንደር ተነስተው “በአሜሪካ ቁጥር አንድ” የተባለ የእርጎ አምራች ኩባንያ ባለቤት የሆኑ ሥራ ፈጣሪና መዋዕለ-ነዋይ አፍሣሽ ይገኙበታል፡፡

በስብሰባው መግቢያ ላይ የተናገሩት የዩናይትድ ስቴትስ ምክትል የውጭ ጉዳይ ሚኒስትር ራበርት ሃርማትዝ የዳያስፐራው ማኅበረሰብ ለዩናይትድ ስቴትስ “ቋንቋዎችን፣ ባሕሎችን፣ የሥራ ዕድሎችን፣ በንግድ ሥራ ውስጥ አደጋዎችንና ሥጋቶችን የመጋፈጥ፣ የማሸነፍና የማስወገድ ልምድን፣ የሣይንስና የቴክኖሎጂ ሃሣቦችንና ችሎታን፣ እንዲሁም የበጎ ፍቃደኝነት መንፈስን ይዞ የመጣ ነው” ብለዋል፡፡

በዛሬው መድረክ ላይ ቀርባ የነበረችው ዓለምአቀፍ ሱፐር ሞዴል ሊያ ከበደ የዓለም የጤና ድርጅትም ዓለምአቀፍ አምባሣደር ነች፡፡ ሊያን በመድረኩ ላይ ያወያይዋት የአሜሪካ ድምፁ ዋና ዳይሬክተር ዴቪድ ኤንሶር ናቸው፡፡

የሦስተኛው የዓለም ዳያስፐራ መድረክ ስፖንሰር ከሆኑ ኩባንያዎችና የሚድያ ተቋማት መካከል የአሜሪካ ድምፅ ራዲዮ ጣቢያ አንዱ ነው፡፡

ለዝርዝርና ለተጨማሪ መረጃ የተያያዘውን የድምፅ ፋይል ያዳምጡ፡፡