የውጪ ዜጎች በመኖሪያ ቤት ግንባታና ችርቻሮ መስክ መሳተፍ እንዲችሉ ሕግ በመረቀቅ ላይ ነው

በኢትዮጵያ የውጪ አገራት ዜጎች በመኖሪያ ቤት ግንባታ እንዲሁም ዓለም አቀፍ ኩባንያዎች በችርቻሮ ንግድ መስክ መሳተፍ እንዲችሉ መንግሥታቸው ሕጋዊ ሁኔታዎችን እንደሚያመቻች ጠቅላይ ሚኒስትር ዐቢይ አህመድ በሣምንቱ መጨረሻ አስታውቀዋል።

“የውጪ አገራት ዜጎች የቤት ንብረት ባለቤት እንዲሆኑ የሚያስችል ሕግ እናወጣለን” ሲሉ ጠቅላይ ሚኒስትሩ ከንግድ ማኅበረሰብ አባላት ጋራ ባደረጉት ስብሰባ ላይ መናገራቸውን የመንግሥት መገናኛ ብዙሃን ካሰራጩት ዘገባ መረዳት ተችሏል።

ሕጉን የማርቀቁ ሂደት የመጨረሻው ምዕራፍ ላይ እንደሚገኝም ጠቅላይ ሚኒስትሩ አስታውቀዋል።

በተጨማሪም መንግሥት በችርቻሮ ንግድ ዘርፍ ያለውን ገደብ በማላላት ኢትዮጵያውያን ብቻ ሳይሆኑ የውጪ አገራት ኩባንያዎችም እንዲሳተፉ እንደሚደረግ ጠቅላይ ሚኒስትሩ ማስታወቃቸውን የኤኤፍፒ ዘገባ አመልክቷል።