በቀላሉ የመሥሪያ ማገናኛዎች

ሁለቱ መሪዎች- በሚሊኒየም አዳራሽ


“ለክፋትና ለመግደል አንደመር” - ጠቅላይ ሚኒስትር አብይ አሕመድ "የከሰርነውን የምናካክስበት ጊዜ ነው”- ፕሬዚዳንት ኢሳያስ አፈወርቂ

በሚሊኒየም አዳራሽ ለኤርትራው ፕሬዚዳንት ኢሳያስ አፈወርቂ መቀበያ በተሰናዳው የሙዚቃ ዝግጅት ላይ ንግግር ያደረጉት የኢትዮጵያው ጠቅላይ ሚኒስትር አብይ አሕመድ “እውነትና ፍቅር ከሁሉም ይልቃል” ብለዋል። “ከኢሳያስ ያላተረፍነው ነገር የለም፤ አሰባስቦናል” ያሉት ጠቅላይ ሚኒስትር አብይ ፕሬዝዳንቱን ደጋግመው “ኢሱ” በሚል ቁልምጫ ሲጠሯቸው ተሰምተዋል።

ጠቅላይ ሚኒስትር አብይ፤ “ኢሳያስ እንደነገረኝ ጤና ሲገኝና በእጃችን ሲሆን እየረከሰ ስናጣው ደግሞ ዋጋ የሚያስከፍል ነው። ሰላምም እንዲሁ ሲኖር እየረከሰ ሲጠፋ ግን ዋጋ የሚያስከፍል ነው። ሰላም የነፃነት ነፃነት ደግሞ የብልፅግና እናት ነች። ከጤና ውጭ ሀብት ከንቱ ነው። ከሰላምና ነፃነት ውጪ ብልፅግናም ሕልም ብቻ ነው። በሰላምና በነፃንት የሚጎዳ በጦርነትና በብጥብጥ የሚጠቀም ማነው?” ሲሉም ጠይቀዋል።

አያይዘውም፤ “ሀገር እንደ ሰው ናት። እኛ እንደሆነው ትሆናለች፣ ብንፋቀር ፍቅር ታዘንባለች። ይቅር ከተባባልን ፈውስ ታፈልቃለች። ብንተጋ ብልፅግናን ታጎርፋለች። ብንማር ትሰለጥናለች። ብንከባበርና ብንተባበር ትከብራለች፣ ትገዝፋለች፣ትልቃለች።” ካሉ በኋላ “መልካም ሰው ያላበቀለች ሀገር እንደሆነች ግን በሰው ስንፍና ትደኸያለች፣ በሰው ግፍና በደል ምድር ታነባለች፣ በሰው ጥላቻና ጦርነት ትደማለች ስንፍናና በደል ትከብራለች፣ ስናድግ ታድጋለች” የሚል ሐሳብ ያለው ንግግርም አድርገዋል።

ከመቶ ሚሊዮን ሕዝብ ውስጥ ክፉት የሚያስብ ሰው አይኖርም ማለት እንደማይቻል ገልፀው ፤ “የመደመር ሚስጥር ለፍቅርና ለደስታ ይሁን፤ ለክፋትና ለመግደል አንደመር” ብለዋል። “ክፉን ካልተጋራነው መክኖ ይቀራል” - ብለዋል ጠቅላይ ሚኒስትሩ።

አያይዘው “የእኛ መደመር ለሌሎች ተስፋ እንጂ ጭንቀት ሊሆን አይገባም” ሲሉ የመደመር ሐሳባቸውን ሚስጥር አብራርተዋል።

በመድረክ ላይ በአማረኛ ንግግር ሲያደርጉ ከዚህ ቀደም የማይደመጡት ፕሬዚዳንት ኢሳያስ አፈወርቂ መድረኩ ላይ ወጥተው ንግግራቸውን ሲጀመሩ ዝግጅቱን የሚታደመው በሺሕዎች የሚቆጠር ሕዝብ በከፍተኛ የድጋፍ ጩኸት ተቀብሏቸዋል።

ሁለቱ ሀገሮች ያለፈውን ባሕላቸውንና ታሪካቸውን ታሳቢ አድርገው፣ ጥላቻና ቂምን አሸንፈው፣ በጋራ ለልማት እንዲሠሩ የጠየቁት ፕሬዚዳንት ኢሳያስ በበኩላቸው ጠቅላይ ሚኒስትር አብይ አሕመድ ለሰላም ያደረጉትን ጥረትና የሚከተሉትን አቅጣጫ አድንቀዋል።

“ማንም ፍቅራችንንና ስምምነታችንን ለመበተንና ላማወክ፣ እርጋታችንን ለማሸበርና ለማጥቃት ልማትና ዕድገችንን ለማደናቀፍና ለማውደም እንዲፈታተነን አንፈቅድም”- ብለዋል።

በመጨረሻም ፤ “በድጋሚ ከባድ መስዋትነት ከፍላቹህ በኃይለና መከታ ላስመዘገባችሁትን ድል እያመሰገንኩ ለዶክተር አቢይና ለብቁ አመራሩ ያለኝን ልባዊ ድጋፍና ድል ምኞት ደግሜ አረጋግጣለሁ።” ብለዋል።

የፌስቡክ አስተያየት መስጫ

XS
SM
MD
LG