በአፍሪካ ከሣሃራ በታች በሚገኙ ሃገሮች እየተስፋፋ የመጣውን ፀረ ሰብል ተምች ለመዋጋት

ዓለምቀፉ የዩናይትድ ስቴትስ የልማት ድርጅት - በአፍሪካ ከሣሃራ በታች በሚገኙ ሃገሮች እየተስፋፋ የመጣውን ፀረ ሰብል ተምች ለመዋጋት የሚያስችሉ ዘዴዎችን ለሚያገኙ የሽልማት ገንዘብ አዘጋጅቷል።

ተምቹ በሚሊዮኖች የሚቆጠሩ የአፍሪካ ገበሬዎችን ሕይወት ለአደጋ አጋልጧል ሲል /ዩኤስኤይዲ/ ባለፈው ሣምንት ማስጠንቀቁ አይዘነጋም።

በአፍሪካ ብዙ ቤተሰቦች በዋና ምግብነት የሚጠቀሙትን በቆሎ ዒላማ ያደረገውን ተምች ሥርጭት ለመግታት ይቻል ዘንድ በመፍትሄ ፍለጋው ተግባር በጋራ እንድንሠራ ለሸሪኮቻችን ጥሪ እናቀርባለን ብለዋል በዩኤስኤድ የምግብ ዋስትና አስተባባሪዋ Regina Eddy.

ኤጀንሲው እጅግ ጠቃሚ የሚለውን መፍትሄ ላቀረበ ተወዳዳሪ፡ $ 150ሺህ የአሜሪካ ዶላር ሽልማት እንደሚሰጥ አስታውቋል። ሌሎች ሁለት የ$75 እና $50 ሺህ ዶላር ሽልማቶችም መዘጋጀታቸው ተነግሯል።