መንግሥታቸው፣ ከፋኖ ታጣቂዎች ጋራ በምስጢር ንግግር ማድረግ መጀመሩን፣ ጠቅላይ ሚኒስትር ዐቢይ አሕመድ ተናግረዋል። የማክሮ ኢኮኖሚ ማሻሻያውን በተመለከተ ማብራሪያ በሰጡበት በትላንቱ መድረክ ላይ ይህን የተናገሩት ጠቅላይ ሚኒስትሩ፣ በንግግሩ መሀል ሦስተኛ ወገን ይኑር አይኑር ግን አልገለጹም።
በአቶ ዘመነ ካሴ ይመራል ባሉት የአማራ ፋኖ፣ በጎጃም የውጭ ጉዳይና የዲያስፖራ ጉዳዮች መምያ ኃላፊ መኾናቸውን የገለፁልን አቶ ስሜነህ ሙላቱ ከመንግሥት ጋራ ምንም የተጀመረ ንግግርም ሆነ ድርድር እንደሌላ ለቪኦኤ ተናግረዋል።
የዐማራ ክልል የሰላም ካውንስል ሕዝብ ግንኙነት ኃላፊ አቶ እያቸው ተሻለ በበኩላቸው፣ ይፋዊ ንግግር ስለመጀመሩ እንደማያውቁ ገልጸው፣ የጠቅላይ ሚኒስትሩ ንግግር ግን፣ “የፌዴራሉ መንግሥት ጥሪያችንን መቀበሉን የሚያመለክት ነው፤” ብለዋል።
ጠቅላይ ሚኒስትሩ “ሸኔ” ሲሉ ከጠሩት የኦሮሞ ነጻነት ሠራዊት ጋራም ምስጢራዊ ንግግር እየተደረገ ነው፤ ብለዋል።
ከኦሮሞ ነጻነት ሠራዊት አመራሮች ምላሽ ለማግኘት ያደረግነው ጥረት አልተሳካም።
ሙሉ ዘገባውን ከተያያዘው የድምጽ ፋይል ይከታተሉ።
መድረክ / ፎረም