መንግስት በተቃዋሚ ፖለቲከኞች ላይ የጣለውን ገደብ ተከትሎ በሴኔጋል ተቃውሞ ተቀሰቀሰ

የሴኔጋል መንግስት የተቃዋሚ ፓርቲ ዕጩዎችን ከታቀደው የህግ አወጭዎች ምርጫ ለማገድ መወሰኑን ተከትሎ በሀገሪቱ ውስጥ ያለው ውጥረት ጫፍ ላይ መድረሱ ተነገረ። በሺዎች የሚቆጠሩ ዜጎች ለተቃዋሚ ፖለቲከኛው ኦስማን ሶንኮ ድጋፋቸውን ለመስጠት ፣ ፕሬዚደንት ማኪ ሳል ተቀናቃኛቸው በምርጫው እንዲሳተፍ እንዲፈቅዱ ለመጠየቅ ወደ ጎዳና ወጥተዋል ።

አርብ ዕለት ተቃዋሚ ሰልፈኞቹ የመኪና ጎማዎች እና የፕላስቲክ ቋቶችን በእሳት ማያያዛቸውን ተከትሎ የዋና ከተማዋ ዳካር ደቡባዊ መንደሮች በጭስ ታጥነው ውለዋል ። ሰልፈኞቹ ላይ የወረደው የአስለቃሽ ጭስ እንዲበታተኑ አድርጓቸዋል ። ቆየት ብለው ድጋሚ ወደ ጎዳናው የተመለሱት ተቃዋሚ ሰልፈኞች “ ማኪ ሳል አንባገነን ነው!” እያሉ ሲጮሁ ተሰምዋል፣ በፖሊሶች ላይም ድንጋይ ወርውረዋል ።

ከተቃዋሚዎች መካከል አንዱ የሆነው ተመራቂ ተማሪ፣ ማይሚና አይዳራ ለአሜሪካ ድምጽ ሲያስረዳ፣ “ ማኪ ሳሊ በሴኔጋል እየፈጸመ ያለው ኢ-ፍትሃዊነት ነው። እየሰራ ያለው ትክክል አይደለም” ብሏል ። ተማሪው ፣ የሴኔጋል ህዝብ በስቃይ ውስጥ እንዳለ ገልጾ ፣ ሳል ከስልጣን እንዲለቁ እንደሚሻ ተናግሯል። ከስልጣን እስኪወርዱም ድረስ ተቃውሞው በየቀኑ እንደሚቀጥልም ተናግሯል።

በሀገሪቱ ውስጥ ቁጣ ያየለው፣ የሴኔጋል የህገ-መንግስት ምክር ቤት በሀምሌ 31/2022 (የጎረጎሳዊያኑ ቀን) ምርጫ ለመሳተፍ የተሰጠውን የተቃዋሚ ዕጩዎች ዝርዝር አለመቀበሉን ተከትሎ ነው። ይሄ ውሳኔ በበኩሉ የተቃዋሚ አመራሩ ሶንኮን እና ሌሎች ተቀናቃኞች በምርጫው እንዳይሳተፉ ያግዳቸዋል ።

የምርጫው ውጤት በአሁኑ ጊዜ በፕሬዚደንቱ ፓርቲ የበላይነት የተያዘውን 165 አባላት ያሉትን የሀገሪቱን ብሄራዊ ጉባኤ ስብጥር ይወስናል።አርብ ዕለት የሀገሪቱ ፖሊስ የተቃዋሚ ፖለቲከኛውን ሶንኮን ቤት በማክበብ ከአርብ የጋራ ጸሎት ስነ-ስርዓት እና ሰልፍ ከልክሏቸዋል ።