ዛሬ ዓርብ ጀርመን ሚዩኒክ ከተማ የሚጀመረው የዓለም አቀፍ ጸጥታ ጉባዔ በዋናነት በእስራኤል እና በሃማስ መካከል በሚካሄደው እንዲሁም በዩክሬን ጦርነት ላይ ያተኩራል።
ዋና ዋና የዓለም መሪዎች፥ የጦር አዛዦችና ዲፕሎማቶች ያሰባሰበው የሚዩኒኩ ጉባኤ ዩናይትድ ስቴትስ የአጋሮቿን ደህንነት በመከላከል ያላትን ቁርጠኝነት በሚመለከት የተፈጠሩ ስጋቶችም እንደሚነሱ ተመልክቷል።
በመከላከያ እና በዲፕሎማሲ ላይ በሚያተኩረው ዓመታዊ የሚዩኒክ የጸጥታ ጉባዔ ላይ ከሚገኙት መሪዎች መካከል የጀርመን ቻንስለር ኦላፍ ሾልዝ፥ የዩናይትድ ስቴትስ ምክትል ፕሬዚደንት ካማላ ሀሪስ እና የዩክሬን ፕሬዚደንት ቮሎዶሚር ዜለንስኪ ይገኙባቸዋል።
በደቡባዊ ጀርመኗ ከተማ እስከ ፊታችን ዕሁድ በሚዘልቀው ጉባኤ ላይ የእስራኤል ፕሬዚደንት አይዛክ ሄርዞግ እንዲሁም የፍልስጤማውያን ጠቅላይ ሚኒስትር መሐመድ ሺታዬ እንደሚገኙ ይጠበቃል።