የሃይማኖት መልክ አለው በተባለ የስልጤ ዞን ቅበት ከተማ ግጭት ጉዳት ደረሰ

የግጭቱ መነሾ፣ “በከተማዋ ከተደረገብን መተት የተነሣ ለሕመም ተዳርገናል፤” ያሉ የእስልምና እምነት ተከታዮች፣ “የመተቱን መንፈስ ከከተማዪቱ ለማባረር” በሚል፣ በድምፅ ማጉያ ቁርዐን ለመቅራት ወደ ጎዳና የወጡ ወጣቶች፣ ከጸጥታ ኃይሎች ጋራ በመጋጨታቸው ነው፤ ሲሉ ነዋሪዎቹ አስረድተዋል።

በግጭቱ ጥቃትን የሸሹ ከአንድ ሺሕ በላይ የክርስትና እምነት ተከታዮች፣ ከከተማው ተፈናቅለው በቡታጅራ የቅድስት ማርያም ቤተ ክርስቲያን ተጠልለው እንደሚገኙ፣ ተፈናቃይ የቅበት ነዋሪዎች፣ በስልክ ለአሜሪካ ድምፅ ተናግረዋል።

ማንነታቸውን ያልጠቀሱ የቅበት ከተማ ፖሊስ ጽሕፈት ቤት ባልደረባም፣ የሃይማኖት መልክ ያለው ግጭት በከተማው ተፈጥሮ እንደነበረና አኹን ግን ወደ መረጋጋት መመለሱን ገልጸዋል።

(ዝርዝሩን ከተያያዘው ፋይል ይከታተሉ)