ኦብነግ ‘የተጠለፉ’ ያላቸው መሪዎቹ ሆስፒታል እንደሚገኙ ገለፀ

ዋሺንግተን ዲ.ሲ. — 




የኦጋዴን ብሔራዊ ነፃ አውጭ ግንባር - ኦብነግ በቅርቡ ኬንያ ዋና ከተማ ናይሮቢ ውስጥ “ተጠልፈውብኛል” ባላቸው ሁለት ከፍተኛ የአመራር አባላቱ ላይ ድብደባና የሥቃይ አያያዝ መድረሱን ግንባሩ አስታውቋል፡፡

ግለሰቦቹ “በጠለፋው ወቅት ደርሶባቸዋል” ባለው ድብደባ ምክንያት በመቁሰላቸው በሁለት ሆስፒታሎች ውስጥ እየታከሙ መሆናቸውንም ግንባሩ ትናንት የካቲት 3/2006 ዓ.ም ባወጣው መግለጫ ገልጿል፡፡

የግንባሩ የውጭ ጉዳዮች ኮሚቴ አባልና የኢትዮጵያ ጉዳዮች ኃላፊ አቶ ሃሰን አብዱላሂ ለቪኦኤ በሰጡት ቃል “የኢትዮጵያ መንግሥት ቀደም ባሉ ግዜያትም የሰላም ስምምነቶችን ከግለሰቦች ጋር ተፈራርሜአለሁ እያለ የፈጠራ ስምምነቶችን ይፈርም ነበር” ብለዋል፡፡

ትናንት የወጣው የግንባሩ መግለጫ “እነዚያን ሰዎች አንድም በማስገደድ፣ አልያም በተጋነነ የሃብትና የሥልጣን ዳረጎ በማማለል የሃቀኛ ነፃ አውጭ ግንባሮችን እና ተቃዋሚዎችን ተዓማኒነት ለማሳጣትና ዓለምአቀፉን ማኅበረሰብ በተሣሣተ አቅጣላ ለመምራት ሲጥር ታይቷል” ብሏል፡፡

ተጠልፈዋል የተባሉትን ሰዎች አስመልክቶ ለቪኦኤ መግለጫ የሰጡት የኢትዮጵያ የውጭ ጉዳይ ሚኒስቴር ቃል አቀባይ አምባሣደር ዲና ሙፍቲ ወደ ኢትዮጵያ በፈቃዳቸው የገቡ ሁለት የኦጋዴን ተወላጆች መኖራቸውን መስማታቸውንና የሶማሌ ክልል መንግሥትም በጉዳዩ ላይ በቅርቡ መግለጫ እንደሚሰጡ ገልፀው ሌላ የሚያውቁት ዝርዝር መረጃ እንደሌለ ተናግረዋል፡፡

የዚህን ዘገባ ዝርዝር እና ከኦብነግ ቃል አቀባይ አቶ ሃሰን አብዱላሂ ጋር የተደረጉ የኦብነግን የዛሬ አቋምና ፍላጎት የሚያብራሩ ቃለ ምልልሶችን ለመስማት የተያያዘውን የድምፅ ፋይል ያዳምጡ፡፡