በቀላሉ የመሥሪያ ማገናኛዎች

ዜና

ለሕዝበ ሙስሊሙ ጥያቄዎች መፍትሔ አፈላላጊ ኮሚቴ ሰብሳቢ ኡስታዝ አቡበከር አሕመድ እና የዋናውና የሕዝብ ግንኙት ኮሚቴውም አባል ኡስታዝ አሕመዲን ጀበል ዛሬ በፖሊስ ቁጥጥር ሥር ከዋሉ በኋላ ማስጠንቀቂያ ተሰጥቷቸው መለቀቃውን ተናግረዋል፡፡

(ይህ ገፅ ሲከፈት የተደራረቡ ወይም የተረበሹ ድምፆችን የሚሰሙ ከሆነ ኮምፕዩተርዎ ከአንድ በላይ ድምፅ ማጫወቻ አለው ማለት ነው፡፡ ስለዚህ ከዚህ ፅሁፍ ሥር ካሉት ማጫወቻዎች አንደኛውን ብቻ አስቀርተው ሌሎቹን ያቁሟቸው፡፡)

ኡስታዝ አቡበከርና ኡስታዝ አህመዲን ዛሬ ከጠዋቱ ሦስት ሰዓት ተኩል አካባቢ ዘነበ ወርቅ እየተባለ በሚጠራው ሠፈር በመኪና እየተጓዙ ሣሉ ተይዘው ለአራት ሰዓታት ያህል እሥር ቤት ውስጥ መቆየታቸውን ተናግረዋል፡፡

በጉዞ ላይ ሣሉ በአንዲት የግል ሠሌዳ ባላት ተሽከርካሪ ውስጥ የነበሩ የሲቪል ልብስ የለበሱ ሰዎች አስቁመዋቸው ወደራሣቸው መኪና ካስገቧቸው በኋላ ወደአዲሱ የአዲስ አበባ ፖሊስ ሕንፃ እንደወሰዷቸው ገልፀዋል፡፡

እዚያ እንደደረሱም በተናጠል ሁለት ሰዓት ለሚሆን ጊዜ በሁለት ባዶ ክፍሎች ውስጥ ካስቀመጧቸው በኋላ እንደዚያው በተናጠል ወደቢሮ እየጠሩ “እኛ የመጣነው ካንተ ጋር ልንወያይ አይደለም፤ ማስጠንቀቀያ ልንሰጥህ ነው፤ እየሆነ ባለው ሂደት ውስጥ ሁለን ነገር የምታደርገው አንተ ነህ፤ የምታደርገውን ነገር ሁሉ እናውቃለን፤ ከተቃዋሚዎች ጋርም ግንኙነት እንዳለህ እናውቃለን፤ ሁሉም መረጃ አለን፤ የምታደርጉትን፣ ሕዝብን በሕዝብ ላይ የምትቀሰቅሱትን፤ ዓላማችሁ ዕምነት አይደለም፤ ፖለቲካ ነው” እንዳሏቸው አመልክተዋል፡፡

ሊሰሟቸውም ፍቃደኛ አለመሆናቸውንና የሚሰጧቸውም “የመጨረሻ ማስጠንቀቂያ” መሆኑን፤ “ከእናንተ ጋር ፍርድ ቤት በመመላለስ የምናጠፋው ጊዜ የለም፤ የራሣችንን እርምጃ እንወስዳለን” ያሏቸው መሆኑን ሁለቱም በየራሣቸው ተናግረዋል፡፡

በኋላም ከቀኑ ሰባት ሰዓት አካባቢ ቀደም ሲል በእሥረኛ ደንብ መሠረት የወሰዱባቸውን የግል ንብረቶቻቸውን መልሰውላቸው እንደለቀቋቸው አመልክተዋል፡፡

ከተያዙበት ጊዜ ጀምሮ ሰዎቹ ካሣይዋቸው ማመናጨቅ፣ የኃይል ቃላትና ማስጠንቀቂያዎች ሌላ የደረሰባቸው የአካል ጥቃት አለመኖሩን ኡስታዝ አቡበከርና ኡስታዝ አህመዲን አመልክተዋል፡፡

ስለሁኔታው ተጨማሪ መረጃ ለማግኘትና ተፈጠረ የተባለውንም አጋጣሚ ለማረጋገጥ ብዙ ሙከራዎችን አድርጌአለሁ፡፡ ወደአዲስ አበባ ፖሊስና ተያዝን ወዳሉበት ኮልፌ ክፍለከተማ ፖሊስ ደውዬ የመረጃ ክፍል ባልደረቦችን አነጋግሬአለሁ፡፡ ስለሚባለው ሁኔታ ለጊዜው የሚያውቁት ነገር እንደሌለ ገልፀውልኛል፡፡ የአዲስ አበባ ፖሊስን ሕዝብ ግንኙነት ለማግኘትም ጠይቄ ሕንፃው አዲስ ስለሆነ እና ቢሯቸው ውስጥም ስልክ ገና ስላልገባ ላገኛቸው እንደማልችል ተነግሮኛል፡፡

ወደአዲስ አበባ ፖሊስ ወንጀል ምርመራ በስልክ ቁጥር 011-1-568311 በተደጋጋሚና ለረዥም ጊዜ ደውዬ የሚያነሱት ሰው የውጭ ድምፅ አይሰማቸውም ይመስለኛል አዲስ አበባ ፖሊስ ወንጀል ምርመራ መሆኑን ብቻ እየነገሩኝ ተዘግቷል፡፡

ወደፌደራል ፖሊስም የመረጃ አገልግሎትና የሕዝብ ግንኙነት ክፍል ደውያለሁ፡፡ የመሥሪያ ቤቱ ኃላፊዎች ሁሉ ስብሰባ ላይ እንደሆኑ ተነግሮኛል፡፡

ወደኢትዮጵያ የሰብዓዊ መብቶች ኮሚሽንም ወደ ኮሚሽነሩ ቢሮና ወደ ኢንፎርሜሽንና ኮምዩኒኬሽንስ ዳይሬክቶሬት ደውዬ ኃላፊዎች ሁሉ ስብሰባ ላይ መሆናቸውና ከሰኞ በፊት ላገኛቸው እንደማልችል፤ ላነጋግረው ወይም ዝርዝር ማብራሪያ ሊሰጠኝ የሚችልም ሰው እንደሌለ ተነግሮኛል፡፡

ጥረታችን ይቀጥላል፡፡ ማንኛውንም መረጃ ከየትኛውም ክፍል ባገኘን ጊዜ ይዘን እንመለሣለን፡፡

ዝርዝሩን የያዘውን ከሁለቱም ጋር የተደረገውን ሙሉ ቃለምልልስ ከተያያዘው የድምፅ ፋይል ያዳምጡ፡፡

(ገፁ ሲከፈት የተደራረቡ ወይም የተረበሹ ድምፆችን የሚሰሙ ከሆነ ከማጫወቻዎቹ አንደኛውን ብቻ አስቀርተው ሌሎቹን ያቁሟቸውየሚጫወተውን እንደገና ያስጀምሩት፡፡ )


የዓለምአቀፉ የግብርና ልማት ድርጅት - ኢፋድ ፕሬዚዳንት ካናዮ ንዋንዜ ይህንን አስተያየታቸውን የሰጡት ዋሽንግተን ዲሲ ላይ በተካሄደው የስምንቱ በኢንዱስትሪ የበለፀጉ ሃገሮች ስብሰባና በውጤቱ ላይ አተኩረው በቅርቡ በኢንተርኔት ባሄዱት ጋዜጣዊ መግለጫ ነው፡፡

በግንቦት አጋማሽ አካባቢ ዋሽንግተን ዲ.ሲ ላይ የተካሄደው የስምንቱ ከበርቴ ሃገሮች ስብሰባ መሪ አጀንዳ ልማትና የምግብ ዋስትና እንደነበሩ ይታወሣል፡፡

የዛሬ ሦስት ዓመት የጣልያኗ ላክዊላ ከተማ ላይ አካሃዶት የነበረውን ጉባዔውን ሲያጠናቅቅ ጂ ስምንት ባወጣው የጋራ መግለጫው ለተራዘመ ጊዜ በግብርናና የምግብ ዋስትናን ለማረጋገጥ በቂ መዋዕለ ነዋይ አለመፍሰሱና አጥጋቢ ሥራም አለመሠራቱ በወቅቱ ከተፈጠረው የምግብ ዋጋ ቀውስ እና ከዓለም አጠቃላይ የምጣኔ ሃብት ውድቀት ጋር ተዳምረው በማደግ ላይ ባሉ ሃገሮች ውስጥ ድህነቱ እንዲባባስ፣ ረሃቡም እንዲበረታ ማድረጋቸውን ገልፀው ነበር፡፡

መቶ ሚሊየን ሰው ወደ ድህነትና የረሃብ አዘቅት እንዲገባ ተገድዷል፡፡ አውሮፓ የዘመን አቆጣጠር በ2015 ዓ.ም እንዲደረስባቸው በዕቅድ ተይዘው፣ ተስፋም ተጥሎባቸው የነበሩ የሚሌንየሙ የልማት ግቦችም ለአደጋ ተጋለጡ፡፡

በረሃብና በድህነት ምክንያት በዓለም ዙሪያ ለብዙ ጉስቁልና የተዳረገው ሰው ቁጥር ከአንድ ቢሊዮን ዘልቆ ተረፈ፡፡

በመሆኑም ላኩላ ላይ የተሰባሰቡት የከበሩ ሃገሮች መሪዎች የሰውን ልጅ ከረሃብና ከድህነት ነፃ ማውጣት ይቻል ዘንድ ቆፍጣናና አጣዳፊ እርምጃ መወሰድ እንዳለበት አስተዋሉ፡፡

በመሆኙም ምግብና የምግብ ዋስትና፣ እንዲሁም ዘላቂ የግብርና ልማት የፖለቲካው ቅድሚያ መሆን ይገባቸዋል ሲሉ አወጁ፡፡

ሐምሌ 3 ቀን 2001 (ልክ የዛሬ ሦስት ዓመት ማለት ነው) ፅፈው በፈረሙትና ለዓለምም ባወጁት ባለ12 ነጥብ መግለጫቸው ላይ ሃያ ሁለት ቢሊየን ዶላር በመጭዎቹ ሦስት ዓመታት ውስጥ ለማዋጣትና ረሃብና ድህነትን በተባባረ ክንድ ለመውጋት መወሰናቸውን አስታወቁ፡፡

ከሦስት ዓመት በኋላ ግንቦት 10 እና 11 / 2004 ዓ.ም ዋሽንግተን ዲ.ሲ ላይ የተጠራው የጂ ስምንት የዘላቂ ልማትና የምግብ ዋስትና ጉባዔ የላክዊላውን መግለጫና የተገቡ ቃሎች ምን ደረጃ ላይ እንደሚገኙ ገምግሞ አዲስ ዕቅድና ዘመቻ ጀምሯል፡፡

ዝርዝሩን ከዘገባው ያዳምጡ፡፡

(ገፁ ሲከፈት የተደራረቡ ወይም የተረበሹ ድምፆችን የሚሰሙ ከሆነ ከማጫወቻዎቹ አንደኛውን ብቻ አስቀርተው የቀሩትን ያቁሟቸው፡፡)

ተጨማሪ ይጫኑ

XS
SM
MD
LG