በቀላሉ የመሥሪያ ማገናኛዎች

ዜና

"የኢትዮጵያ የአየር ሁኔታ በአሜሪካ ላይ ከባድ ተፅዕኖ አለው"

በኢትዮጵያ ደጋማ አካባቢዎች የሚፈጠሩ ደመናዎች ሰሃራ በረሃንና አትላንቲክ ውቅያኖስን አቋርጠው አሜሪካን በከባዶቹ የባሕር ማዕበሎች (ሃሪኬኖች) እንደሚመቷት አንድ ባለሙያ አስታወቁ፡፡

በዩናይትድ ስቴትስ የከኔክቲከት ዩኒቨርሲቲ ረዳት ፕሮፌሰርና የአየርና የውኃ የተፈጥሮ ሃብቶች ተመራማሪው ዶ/ር መኮንን ገብረሚካኤል ለአሜሪካ ድምፅ በሰጡት ማብራሪያ የአየር ንብረት ለውጥ በተለይ ለድኆቹ ሃገሮች እጅግ የከበደ መዘዝ እንዳለው ተናግረዋል፡፡

ይህም ጫና የሚንፀባረቀው በሰዉ ጤና፣ በግብርናው ዘርፍ፣ ኃይል በማመንጨት ችሎታና አቅም እንዲሁም በውኃና በሌሎችም ሃብቶች ላይ መሆኑን አመልክተዋል፡፡

ዓለም ባለፈው ታሕሣስ 2002 ዓ.ም ዴንማርክ ዋና ከተማ ኮፐንሃገን ላይ ተደርጎ ከነበረው የዓለም የአየር ንብረት ጉባዔ ብዙ ውጤት በጉጉት ጠብቆ እንደነበና የተገኘው ግን ትንሽ በመሆኑ ዓለም ተስፋ ቆርጦና አዝኖ መበተኑን አስታውሰዋል፡፡

ሰሞኑን በሜክሲኮዋ ከተማ ካንኩን የተካሄደው ጉባዔ ምንም እንኳን በኮፐንሃገን ተስፋ መቁረጥ ምክንያት ቀዝቃዛ አቀባበል የተደረገለት ቢሆንም በውጤቱ ግን ካለፈው ጉባዔ የተሻለ መሆኑን፣ በገንዘብም ይሁን ሙቀት አማቂ ጋዞችን በመቆጣጠር በኩል ተጨባጭ እንቅስቃሴ የታየበትና ዓለም በትክክለኛው አቅጣጫ እየተጓዘ መሆኑን የሚያሣይ እንደነበር ዶ/ር መኮንን ጠቁመዋል፡፡

በተለይም የካርቦን ልቀትን ለመቆጣጠር ሃገሮች የተስማሙበት የኪዮቶ ፕሮቶኮል ኃይሉን ሊያጣ የቀረው አንድ ዓመት ብቻ የመሆኑ ጉዳይ እንቅስቃሴው ይበልጥ የተፋጠነ እንዲሆን የሚያሣስብ መሆኑንም ገልፀዋል፡፡

ለዝርዝሩ ቃለምልልሱን ያዳምጡ፡፡

ለስድስት ወራት ያህል ሥርጭቱን አቋርጦ የነበረው የኢትዮጵያ ሣተላይት ቴሌቪዥን (ኢሣት) ከዓርብ፤ ኅዳር 24 ቀን ጀምሮ አገልግሎቱን መጀመሩን አስታውቋል፡፡

ሥርጭቱን ለኢትዮጵያና አካባቢዋ፣ እንዲሁም ከሰሜን አሜሪካ በስተቀር በመላው ዓለም እንደሚያደርስ የገለፁት የኢሣት ቃልአቀባይ አቶ ክንፉ አሰፋ ለአሜሪካ ድምፅ በሰጡት መግለጫ ከተመሠረተ የዘጠኝ ወራት ዕድሜ ያለው የጣቢያቸው ሥርጭት ለአራተኛ ጊዜ ለመቋረጥ ተገድዶ እንደነበር አመልክተዋል፡፡

አቶ ክንፉ ሲናገሩ ፕሮግራሞቹን ተቀብሎ የማሠራጨቱን አገልግሎት ይሠጣቸው ከነበረው ከዐረብ ሣት ጋር ባደረጉት ውይይት ሥርጭቱ የተቋረጠው በተለይ በሰሜን አሜሪካ ወደ ሣተላይት በሚላክ ሞገድ ምክንያት መረበሽ መፈጠሩን ገልፀው ሞገዱ የሚላከው በኢትዮጵያ መንግሥት እንደነበረም ጠቁመዋል፡፡

በዚህም ምክንያት ሌሎችም ሥርጭቶች ተፅዕኖው የጎዳቸው በመሆኑ ዐረብ ሣት ለኢትዮጵያና ለኤርትራ መንግሥታት፣ እንዲሁም ለኢሣት ደብዳቤ ፅፎ ሁሉንም ያወረዳቸው መሆኑን ቃልአቀባዩ ጠቁመው በኋላም ዋነኛው ዒላማ የነበረው ኢሣት እንደነበረ በመረዳት ዐረብ ሣት ሌሎች ደንበኞቼን በናንተ ምክንያት ማጣት አልፈልግም ብሎ አገልግሎቱን መስጠት እንዳቆመ አስረድተዋል፡፡

ለስድስት ወራት ያህል ከአየር ላይ የጠፉትም ሌላ የሣተላይት ሥርጭት አገልግሎት ሰጭ ሲያፈላልጉ በመቆየታቸው እንደነበር አቶ ክንፉ ገልፀዋል፡፡

"ኢሣት የተቋረጠው በራሣቸው የውስጥ ችግር ምክንያት ነው" ሲሉ በቅርቡ አንድ የኢትዮጵያ ባለሥልጣን የሰጡትን መግለጫ ቃልአቀባዩ አስተባብለዋል፡፡

ከኅዳር 24 ቀን 2003 ዓ.ም ጀምሮ በታይኮም ሣት በ "ሲ ባንድ" ለሚተላለፈው አዲሱ ሥርጭታቸው ከአገልግሎት ሠጭው ጋር የተራዘመ ጊዜ ውል መፈረማቸውንና በውስጣቸውም ሆነ ከክፍያ ጋር የተያያዘ ችግር እንደሌለባቸው አቶ አውሮፓ የሚገኙት የኢሣት ቃል አቀባይ አቶ ክንፉ አሰፋ አመልክተዋል፡፡

ለዝርዝሩ ቃለምልልሱን ያዳምጡ፡፡

ተጨማሪ ይጫኑ

XS
SM
MD
LG