የተባበሩት መንግሥታት ድርጅት —
ፋይል ፎቶ - የዩናይትድ ስቴትስ የመወሰኛው ምክር ቤት የውጭ ግንኙነቶች ኮሚቴ ሊቀመንበር ሪፑብሊካኑ ሴኔተር ቦብ ኮርከር
ፋይል ፎቶ - ቻዳውያን ሰላም አስከባሪዎች በአግውልሆክ የተባለች ከተማ ማሊ ውስጥ ጥበቃ ላይ እ.አ.አ. 2014
የተባበሩት መንግሥታት ድርጅት በሰላም አስከባሪዎቹ ወሲባዊ ምግባር ብልሹነት ምክኒያት ለዓለሙ ድርጅት የምንሰጠውን ገንዘብ ልንቆርጥበት እንችል ይሆናል ሲሉ የዩናይትድ ስቴትስ የመወሰኛው ምክር ቤት የውጭ ግንኙነቶች ኮሚቴ ሊቀመንበር አስጠነቀቁ።
ሪፑብሊካኑ ሴኔተር ቦብ ኮርከር የመንግሥታቱ ድርጅት ሰላም አስከባሪዎች በተለይም በመካከለኛ አፍሪካ ሪፑብሊክና በኮንጎ ዲሞክራቲክ ሪፑብሊክ የተመደቡት ወታደሮቹ ፈጸሙት የተባለው ወሲባዊ ጥቃት እጅግ ያስቆጣቸው መሆኑን አመልክተዋል።
"የመንግሥታቱ ድርጅት በብቃት ማነስ ምክኒያት የምንሰጠውን ገንዘብ ብናስቀርበት ብርቱ ቅጣት ቢጣልበት። ወሳኝ የሆነውን ዓቅም ለመገንባት ከባድ ችግር ላይ ነው የሚወድቀው።" ብለዋል ሴኔተር ኮርከር።
ከስምንት ቢሊዮን ዶላሩ የድርጅቱ ዓመታዊ የሰላም ማስከበር እንቅስቃሴ በጀት ሩቡን የምታዋጣው ዩናይትድ ስቴትስ ስትሆን ብዛት ያላቸው ሴናተሮች እንዲህ ያለ መጠነ ሰፊ የወሲባዊ ጥቃት ውንጀላ እያለ የግብር ከፋዩን ገንዘብ መስጠታችንን መቀጠል የለብንም እያሉ ናቸው።
የመንግሥታቱ ድርጅት በወሲባዊ ጥቃቱ በተወነጀሉ ሰላም አስከባሪዎች ላይ ጠበቅ እያለ ርምጃ እየወሰደ ሲሆን ቢያንስ ሁለት ክፍለ ጦሮችን ወደሃገራቸው መልሷል። ይሁንና አዳዲስ ውንጀላዎች እየቀረቡ ናቸው።
